Qyzylorda oblysy: eki aýdandaǵy ákim saılaýynda 72 myń adam daýys beredi
Qyzylorda oblysynda Shıeli jáne Syrdarııa aýdandaryndaǵy ákim saılaýynda 72 myńnan astam adam óz tańdaýyn jasaıdy, dep habarlaıdy QazAqparat tilshisi.
Pılottyq negizde bastaý alǵan saılaý jergilikti máslıhat sheshimimen Qyzylorda oblysynda Shıeli jáne Syrdarııa aýdandarynda ótkiziledi. Bul maqsatta Syrdarııa aýdanynda - 18, Shıeli aýdanynda - 40 ýchaskelik komıssııa jumys isteıdi. Onda 388 komıssııa múshesi qyzmet atqarady.
«Eki aýdanda saılaý ótkizýge jaýapty barlyq komıssııa músheleri arnaıy biliktilik oqytýynan ótti. Jergilikti ákimdik saılaýshylar tizimin jasaýda belsendi jumys júrgizýde. Qyrkúıektegi jaǵdaı boıynsha Syrdarııa aýdanynda – 22101, Shıeli aýdanynda – 50402 saılaýshy tirkelgen. Óńirde daýys beretin azamattar úshin «Ózińdi saılaýshylar tiziminen tekser» atty arnaıy servıs iske qosyldy. Shıeli jáne Syrdarııa aýdanynyń turǵyndary saylau.orda.gov.kz saıtyna kirip, JSN nómirin terý arqyly óz ýchaskesin ońaı taba alady. Servıste ýchaskeniń nómirinen bastap komıssııa quramy men meken-jaıy jáne baılanys derekteri kórsetilgen. Munan bólek, saılaýshylar úshin 109 biryńǵaı baılanys ortalyǵy da jumys isteıdi», - dep málim etti Qyzylorda oblystyq saılaý komıssııasynan.
Vedomstvo málimetinshe, dıspetcherler aýdan ákimderiniń saılaýyna qatysty turǵyndardyń saýaldaryna jaýap beredi. Kandıdattardyń usynylǵan qujattary tekserýden ótkennen keıin tirkeý protsesi júrgizilip, úgit kezeńi bastalady.
