Jańa Salyq kodeksi: Memleket bızneske qatysty usynystyń 70 paıyzyn qanaǵattandyrdy
ASTANA. KAZINFORM – Elimizde jańa Salyq kodeksiniń jobasyna qatysty jumystar belsendi júrgizilip jatyr. Osy oraıda «Atameken» UKP Basqarma tóraǵasynyń orynbasary Tımýr Jarkenov Jibek Joly telearnasyna bergen suhbatynda bıznes-qoǵamdastyq qandaı ıdeıalar men usynystar beretinin aıtty.
Tımýr Jarkenovtiń aıtýynsha, elimizdiń barlyq bıznes-qoǵamdastyǵy bul jumysqa belsendi qatysady. Kásipkerler palatasy memlekettik organdarmen ózara is-qımyldy qamtamasyz etý úshin bıznes usynystaryn shoǵyrlandyrady. Ózgertýler shaǵyn jáne orta bıznesti, iri kásiporyndardy jáne taý-ken salasyn qosa alǵanda ekonomıkanyń barlyq salasyn qamtıdy.
Jalpy, Kásipkerler palatasy bıznesten 400 usynys aldy. Degenmen olardyń kóbi qaıtalanatyny eskerilip, tek jartysy ǵana memlekettik organdarǵa jiberildi. Qazirgi ýaqytta olardyń shamamen 70 paıyzy jumysqa qabyldandy jáne qanaǵattandyryldy.
«Mysaly, naǵyz usynystardyń biri úı janyndaǵy dúkenderge, atap aıtqanda alkogol ónimderin satýǵa qatysty boldy. Buǵan deıin ol úshin arnaıy ruqsat pen belgili bir tólem talap etiletin. Munyń ústine ol iri sýpermarketter úshin de, shaǵyn dúkender úshin de birdeı edi. UKP bastamasymen aldaǵy ýaqytta bul tólem joıylady», - dedi Tımýr Jarkenov.
Sondaı-aq, onyń aıtýynsha, qazirgi ýaqytta quldyrap turǵan taý-ken salasynyń máseleleri de talqylandy.
«Qazirgi ýaqytta Qazaqstandaǵy geologııalyq barlaýdyń barlyq protsesin qaıta bastaý úshin is-sharalar júrgizý qajet. Jalpy alǵanda, barlyq barlanǵan qordyń basym úlesi jáne olardy óndirý men óńdeý keńes zamanynan bastaldy. Qazaqstandaǵy osyndaı irgeli sala ekonomıkanyń lokomotıvi bolyp qala berýi úshin geologııalyq barlaý jumystaryn qoldaýdy kúsheıtken jón. Osy jáne basqa da máseleler jańa Salyq kodeksin ázirleý barysynda kóterildi jáne olardyń kópshiligi memleket tarapynan oń baǵa aldy», - dep atap ótti «Atameken» UKP tóraǵasynyń orynbasary.
