Qyzylorda oblysy alǵash ret Eýropaǵa qamys eksporttaı bastady
QYZYLORDA. KAZINFORM — Qyzylorda oblysynda aýyl sharýashylyǵy ónimderiniń eksporttyq áleýeti jyl sanap artyp keledi.
Statıstıkalyq málimetterge qaraǵanda, ótken jyldyń 1 mamyryna oblystan 12,5 mln dollardyń 22 myń tonna aýyl sharýashylyǵy ónimderi álemniń 15 memleketine eksporttaldy.
Olardyń arasynda kúrish, balyq ónimderi, kúrish qaldyǵy, qamys bar.
Qyzylorda oblysynan eksporttalǵan barlyq ónimniń basym bóligi — kúrish. Bul ónimder Reseı, Belarýs, Qyrǵyzstan, Ázirbaıjan, Ózbekstan, Tájikstan, Ýkraına, Túrkimenstan, Grýzııa, Mońǵolııa jáne ózge de elderge jol tartqan.
Qyzylorda oblysynan Polsha, Lıtva, Germanııa, Frantsııa, Grýzııa, Ázirbaıjan, Avstrııa, Nıderlandy, Reseı, Qytaı, Danııa, Chehııa jáne Rýmynııa memleketterine balyq jóneltildi.
Al Germanııa, Danııa, Nıderland, Polsha jáne Frantsııaǵa qamys jiberildi.
Eýropa elderinde qamys úılerdiń shatyryna arnalǵan toqyma sebetin jasaýǵa paıdalanylady.
Bul ónim bıyl alǵash ret eksportqa shyǵarylǵan. Búgingi kúnge deıin 122,1 tonna Germanııaǵa jiberilgen.
Mamandardyń aıtýynsha, astyq tuqymdasyna jatatyn kópjyldyq shóptesin ósimdik — qamys jer sharynda keńinen taralǵan. Tek Arktıka men Antarktıdada kezdespeıdi.
Qazaqstanda jerasty sýy jer betine jaqyn jatqan shalǵyndy, qumdy, sortań jerlerde ósetin 2 túri bar.
Eń jıi kezdesetini — kádimgi qamys nemese quraq. Qamystan sebet toqylady, qurylysta qoldanylady.
Odan hımııalyq óńdeý jolymen shaıyr, metıl spırti, sirke qyshqyly, qaǵaz alynady.
Aıta ketsek, Syr óńirinde bıyl 191,5 myń gektarǵa aýyl sharýashylyǵy daqyldary egildi.
Negizgi daqyl kúrishtiń kólemi — 83,1 myń gektar. Ótken jylmen salystyrǵanda jalpy egis kólemi 2,9 myń gektarǵa azaıtyldy.
Onyń ishinde kúrishtiń kólemi 7,8 myń gektarǵa tómendetildi. Oblysta egisti ártaraptandyrý jalǵasyn tabady.
Memlekettik qoldaýdyń arqasynda bıyl 31,5 mlrd teńgeniń ónimi óndirilip, ósim kórsetkishi 1,5 paıyzǵa artqan.
Negizgi qorǵa salynǵan ınvestıtsııa 5,2 paıyz, ol tamaq ónimderin óndirýde 28,1 paıyzǵa ósken.
