Qyzylorda oblysy ákimdiginiń eki laýazymdy tulǵasy jazalandy
ASTANA. KAZINFORM - Qyzylorda oblysy ákimdigine qarasty eki basqarmanyń laýazymdy tulǵalary «Prokýratýra týraly» Konstıtýtsııalyq zańnyń talaptaryn buzǵandary úshin ákimshilik jaýaptylyqqa tartyldy.
Oblys prokýratýrasy mal jaıýǵa arnalǵan jaıylymdardyń jetispeýshiligine taldaý jasap, nátıjesinde mal sanynyń statıstıkasyn qalyptastyrý barysynda buzýshylyqtarǵa jol berilgenin anyqtady.
Atalǵan derek boıynsha prokýratýra oblystyń aýyl sharýashylyǵy jáne jer qatynastary basqarmasyna usyný engizdi. Degenmen osy basqarmanyń basshysymen qadaǵalaý aktisine ýaqytyly jaýap berilmegendikten, ol sotpen QR ÁQBtK-niń 664-babymen ákimshilik aıyppul túrindegi jaýaptylyqqa tartyldy.
Ózge jaǵdaıda Qyzylorda oblysynyń Tabıǵı resýrstar jáne tabıǵat paıdalanýdy retteý basqarmasy Tabıǵat qorǵaý prokýratýrasynyń tekserýge qajetti qujattardy usyný týraly talabyna nemquraılylyqpen qarap, prokýrordyń zańdy talabyn oryndamaǵan.
Atalǵan áreket úshin basshysy sot qaýlysymen QR ÁQBtK-niń 665-babynyń 2-bóligimen ákimshilik jaýaptylyqqa tartylyp, oǵan 172 myń teńge aıyppul salyndy.
