Qyzylorda men Túrkistanda Prezıdent teleradıokesheniniń kınolektorııi ótti
ASTANA. KAZINFORM — Aýqymdy aǵartýshylyq joba Qazaqstan Respýblıkasy Prezıdenti Teleradıokesheniniń 30 jyldyǵy aıasynda júzege asyrylyp otyr.
Kınolektorııdiń alǵashqy kúni Qyzylorda men Túrkistan kórermenderiniń nazaryna «Aral» jáne «Sert» derekti fılmderi usynyldy.
«Aral» fılminiń basty keıipkeri — jarty ǵasyrdan astam ǵumyryn balyq aýlaýmen ótkizgen Kúntýǵan Turǵanbaev. Avtorlar qarııanyń taǵdyry arqyly Aral teńiziniń tarıhyn, adam men tabıǵattyń baılanysyn jáne óńirde sońǵy onjyldyqtarda bolǵan ózgeristerdi kórsetedi.
Kúntýǵan Turǵanbaev fılmge qatysý ózi úshin erekshe tájirıbe bolǵanyn atap ótti.
— Bir aptadaı túsirilim tobymen birge júrip, kezinde balyq aýlaǵan tanys jerlerimdi qaıta kórdim. Teńiz ótken ǵasyrdyń 60-jyldarynan bastap tartyla bastady. Prezıdent Qasym-Jomart Toqaevtyń bastamasymen júzege asyrylyp jatqan jumys nátıjesinde teńiz birte-birte orala bastady, — dedi ol.
Fılmde búginde Aral teńiziniń shamamen 36 paıyzy qalpyna kelgeni aıtylǵan.
Qyzylorda oblysy ákiminiń orynbasary Meırambek Shermaǵanbet fılm avtorlaryna Aral taqyrybyna tereń úńilip, asha bilgeni úshin alǵys aıtty.
— Kúntýǵan atanyń taǵdyry — bir adamnyń ǵana emes, Araldyń taǵdyry. Jarty saǵatqa Araldyń ótkeni men búginin syıdyrǵany kóńilge jylylyq uıalatty. Ulttyq Quryltaıdyń V otyrysynda Memleket basshysy Aral teńizi máselesine toqtalyp, onyń jahandyq mańyzyn atap ótken bolatyn. Bul fılm bolashaq urpaq aldyndaǵy Araldy saqtaý jaýapkershiligin eske salady, — dedi ol.
«Sert» fılmi kórermenge Qazaqstannyń 2024 jylǵy kóktemgi joıqyn sý tasqyny saldaryn qalaı eńsergenin kórsetedi. Memleket basshysynyń jeke baqylaýymen qysqa merzim ishinde tabıǵı apat saldary joıylyp, jańa úıler salyndy, ınfraqurylym qalpyna keltirilip, turǵyndar óz úılerine oraldy.
Túrkistan qalasy ákiminiń orynbasary Madııar Álipov te qos kartınaǵa joǵary baǵa berdi.
— Eki fılm de óte áserli shyqqan. Kúntýǵan qarııanyń taǵdyry arqyly bir adamnyń ǵana emes, tutas Aral óńiriniń tarıhy men taǵdyry ashylǵan. Al «Sert» fılmi árbir oqıǵanyń artynda adam taǵdyry turǵanyn shynaıy jetkizip, el birligi men yntymaǵy myqty bolsa, kez kelgen qıyndyqty eńserýge bolatynyn ańǵartady, — dedi ol.
Kórsetilimnen keıin Qyzylorda men Túrkistan turǵyndary fılmder jaıly óz pikirlerimen bólisti. Kórermender rejısserlik jáne operatorlyq jumystyń joǵary deńgeıde oryndalǵanyn, sondaı-aq týyndylardyń shynaıylyǵy men óz ornymen baıandalýyn erekshe atap ótti.
Túrkistan turǵyny Janna Jaılaýbaıqyzy «Aral» fılmin halyqaralyq derekti jobalarmen salystyrdy.
— Aral — tek teńiz ǵana emes, sol mańda ómir súrgen halyqtyń taǵdyry men turmysy. Fılmdegi sımvolıkalyq sheshimder, kúnniń batýy, qarııanyń tóbeshikte otyryp syr shertýi sekildi kadrlar týyndynyń kórkemdik tereńdigin aıqyndaı túsedi, — dedi Janna Jaılaýbaıqyzy.
Qala turǵyndary «Sert» fılmin de erekshe ásermen qabyldap, qıyn kezeńde Prezıdent qoldaýy men memlekettiń kómegi mańyzdy ról atqarǵanyn aıtty.
— «Sert» fılmi qazaqstandyq qoǵamnyń qalaı jumyla alatynyn kórsetedi. Týyndy eń qıyn sátterde de halyqtyń rýhy myqty bolatynyn, al memleket pen azamattardyń birlesken áreketi kez kelgen daǵdarysty birlik sabaǵyna aınaldyratynyn aıqyn kórsetedi, — dedi qala turǵyny Átirkúl Táshimova.
Kınolektorııdiń ekinshi kúni kórermenderge «Travel Kazakhstan» jáne «Qýatty seriktes» fılmderi usynyldy. «Travel Kazakhstan» týyndysy elimizdiń týrıstik áleýetine arnalsa, «Qýatty seriktes» fılmi Qazaqstan men Japonııa arasyndaǵy yntymaqtastyqtyń damýyn baıandaıdy.
Eske sala keteıik, Prezıdent teleradıokesheniniń «Hronıkadan — bolashaqqa» atty kınolektorııi 21 mamyrda Astanada bastalǵan bolatyn. Qyzylorda men Túrkistannan keıin kórsetilimder Shymkent, Taraz, Aqtaý, Atyraý, Oral, Aqtóbe, Óskemen, Semeı, Pavlodar, Petropavl, Qostanaı, Jezqazǵan, Qaraǵandy, Kókshetaý, Taldyqorǵan jáne Qonaev qalalarynda jalǵasady.
Barlyq fılmder Prezıdent teleradıokesheniniń jeke prodakshn-bazasy — Derekti kıno ortalyǵynda túsirilgen. Stsenarıı avtory — Nurlan Qabdaı, rejısserleri — Zýhrab Otarov pen Dáýlet Áýelbekov.
Derekti fılmder kórsetilimi oblys ákimdikteriniń qoldaýymen óńirlik kınoteatrlarda uıymdastyrylyp jatyr. Kirý tegin.
Qorytyndy kórsetilim 25 qyrkúıekte Almaty qalasynda ótedi.
Osyǵan deıin Prezıdent teleradıokesheniniń kınolektorııi eldiń barlyq aımaǵyn aralaıtyny týraly jazdyq.
