Qyzylorda kásiporyndarynyń jalaqyǵa qaryzy joq — eńbek ınspektsııasy

QYZYLORDA. KAZINFORM — Ótken jyly Qyzylorda oblysyndaǵy 3 kásiporynda 5 jumysshy úshin 2,8 mln teńge jalaqy qaryzy bolǵan. 

Memlekettik eńbek ınspektsııasy komıtetiniń oblystyq departamenti jyl ishinde bereshek tolyq ótelgenin málimdedi.

— Qazirgi kúni jergilikti kásiporyndarda aǵymdaǵy jáne uzaq merzimdi jalaqyǵa qaryz máselesi joq, — dedi departament basshysy Bektemir Jumaǵulov.

Byltyr ujymdyq daý týyndaý qaýpi paıda bolǵan 8 kásiporynda monıtorıng júrgizildi. 

— Narazylyqtardyń negizgi sebebi — jalaqyny kóbeıtý, eńbek jaǵdaıyn jaqsartý jáne zııandy eńbek jaǵdaıynda jumys isteıtinderge kásiptik zeınetaqy jarnasynyń tólenbeýi. Quzyrly organdarmen birge shuǵyl áreket etý nátıjesinde kásiporyndardaǵy ahýal turaqtaldy. Eńbek ujymdarymen kezdesip, máseleni zań aıasynda túsindirdik, — dedi departament basshysy.

Bul salada da tsıfrlandyrýǵa jáne barlyq protsestiń ashyqtyǵyn arttyrýǵa basymdyq berilip otyr. Ótken jyly josparǵa sáıkes 785 kásiporynnyń ujymdyq sharttary tsıfrlandyrylyp, 6838 kásiporyndaǵy 132 325 adamnyń eńbek sharttary biryńǵaı júıege engizildi. 

Ótken jyly Qyzylorda oblysynyń memlekettik eńbek ınspektorlary tekserý nátıjesinde 348 zańbuzýshylyqty anyqtaǵan bolatyn.