Eńbek zańnamasyn buzǵandarǵa 9,5 mln teńge aıyppul salyndy

QYZYLORDA. KAZINFORM – Ótken jyly Qyzylorda oblysynyń memlekettik eńbek ınspektorlary tekserý nátıjesinde 348 zańbuzýshylyqty anyqtady. Bul týraly memlekettik eńbek ınspektsııasy komıtetiniń Qyzylorda oblysy boıynsha departamenti málimdedi.

235 nusqama berilse, sonyń 212-si nemese 90,2%-y oryndaldy.

- Eńbek zańnamasy talaptaryn buzǵandarǵa qatysty 49 ákimshilik is qozǵalyp, 2 eskertý berildi. 9,5 mln teńge aıyppul salyndy. Onyń 8,6 mln teńgesi bıýdjetke tústi, qalǵan bóligi merzimine sáıkes óndirilip jatyr, - dedi departament basshysy Bektemir Jumaǵulov.

Byltyr 517 jumysshynyń buzylǵan eńbek quqyǵy qalpyna keltirildi. Jumys ornyndaǵy 68 jazataıym oqıǵa tergelip-tekserilip, onyń 39-y eńbek qyzmetimen baılanysty dep tanyldy.

- Zardap shekkender sany 57 boldy, bul 2024 jylǵydan 14%-ǵa kóp. Esepti merzimde memlekettik eńbek ınspektorlarynyń qaraýyna jeke jáne zańdy tulǵalardan 2124 ótinish túsip, zańdylyqtarǵa sáıkes qaraldy. Onyń 551-i (25,9%) qanaǵattandyrylǵan, 473-i (22,2%) qaraý rettiligimen basqa organǵa joldansa, 1100 (51,7%) ótinishke zańnama talaptaryna sáıkes jaýaptar berilgen, - dedi departament basshysy.

Eske salsaq, elimizde aqparattar júıesin ıntegratsııalaý arqyly kásiporyndarda bolǵan tótenshe jaǵdaılardy tergeý barysy tolyq avtomattandyryldy.