Qyzylordadaǵy kásiporyndarda eńbek shıelenisi qalaı sheshildi
QYZYLORDA. KAZINFORM — Jyl basynda Qyzylorda oblysyndaǵy «Petro Qazaqstan Qumkól Resorsız» AQ, «Saýts-Oıl» jáne «Qazgermunaı» BK» JShS-de eńbek shıelenisi týyndaǵan bolatyn. Munaı kásiporyndaryndaǵy máseleniń sheshimi týraly eńbek ınspektsııasy baıandap berdi.
Narazylyqtyń negizgi sebebi — jalaqyny kóbeıtý jáne eńbek jaǵdaıyn jaqsartý.
— Jumysshylar jalaqyny ósirý, tamaq jáne asýyzsý máselesin kótergen. Munyń barlyǵy áleýmettik áriptestik jónindegi oblystyq úshjaqty komıssııada qaralyp, kásiporyn basshylaryna jumysshylardyń talabyn oryndaý jóninde usynys berildi. Oblys ákiminiń basshylyǵymen jáne basqa da quzyrly organdardyń aralasýymen shuǵyl áreket etý nátıjesinde sheshildi. Jalaqy kásiporyndardyń birinde 10,2 paıyzǵa, birinde 15 paıyzǵa kóterildi, — dedi Memlekettik eńbek ınspektsııasy komıteti Qyzylorda oblysy boıynsha departamentiniń basshysy Bektemir Jumaǵulov.
Memlekettik eńbek ınspektorlary jyl basynan beri 87 tekserý júrgizip, 125 buzýshylyqty anyqtap, 73 nusqama bergen.
— Júrgizilgen tekserýler nátıjesinde eńbek zańnamasy talaptaryn buzǵandarǵa qatysty 13 ákimshilik is qozǵaldy. Jalpy somasy 3,5 mln teńge aıyppul salyndy. 217 jumysshynyń buzylǵan eńbek quqyǵy qalpyna keltirildi, — dedi Bektemir Jumaǵulov.
Buǵan deıin biz Pavlodar óńirinde sońǵy úsh jylda óndiristegi jazataıym oqıǵalardan 20 adam kóz jumǵanyn jazdyq.
