Qyzylorda qalasynyń aýmaǵy ulǵaıdy
QYZYLORDA. KAZINFORM — Ótken jyly Qyzylorda qalasynyń sáýlettik kelbetin jaqsartý baǵytynda 40-qa jýyq eskızdik joba ázirlendi.
Qalalyq sáýlet jáne qala qurylysy bóliminen málimdegendeı, onyń ishinde alleıalar men qoǵamdyq keńistikterdi abattandyrý, kópqabatty úılerdiń qasbetterin jańartý, Syrdarııa ózeniniń jaǵalaý aýmaǵyn damytý, áleýmettik nysandar men ınfraqurylym obektilerin árleý jobalary bar.
— Qalanyń jańa bas josparyn ázirleý jumysy jalǵasyp jatyr. Qala aýmaǵy 172 gektarǵa ulǵaıyp, jalpy shekarasy 20 700 gektar bolyp belgilendi. Jobanyń qorytyndy kezeńi memlekettik saraptama talaptaryna baılanysty. Bıyl bas jospar men eldi mekenderdi damytý shemalaryn bekitý josparlanǵan, — delingen habarlamada.
Bólim qyzmetkerleri ótken jyly zańsyz qurylys obektilerine monıtorıng júrgizý nátıjesinde ruqsat qujattarynsyz salynǵan 298 kásipkerlik nysanyn anyqtap, zań talabyna sáıkes sharalar qabyldady. Nysan ıelerine 44,1 mln teńge kólemindegi aıyppul salyndy.
Buǵan deıin Qyzylorda qalasynda 6 sanat boıynsha 34 160 otbasy turǵyn úı kezeginde turǵanyn jazǵan edik.