Qyzylorda qalasynda jańa jylý-elektr ortalyǵy salynyp jatyr

QYZYLORDA. KAZINFORM — Qyzylorda qalasynda 215 mlrd teńgege qýattylyǵy 240 megavattyq jańa jylý-elektr ortalyǵynyń qurylysy qarqyndy júrip jatyr. 

Memleket basshysynyń elimizdegi jylý-elektr ortalyqtarynyń jumysyn jandandyrý tapsyrmasyna sáıkes Syr elinde iri joba júzege asyp jatyr. Búginde Qyzylorda qalasynda jańa jylý-elektr ortalyǵynyń qurylysy qarqyn aldy. 

Bul týraly oblys ákimi Nurlybek Nálibaev Ortalyq kommýnıkatsııalar qyzmetiniń brıfınginde baıandady.

«Turǵyndardy elektr energııasymen qamtý baǵytynda 11 mlrd teńgege 38 joba júzege asyrylýda. Aımaqtaǵy elektr energııasy tapshylyǵy máselesin sheshý úshin Qyzylorda qalasynda 215 mlrd.teńgege qýattylyǵy 240 megavattyq jańa jylý-elektr ortalyǵynyń qurylysy qarqyndy júrýde. Investor — „Aksa Enerdjı“ túrik kompanııasy jylý ortalyǵynyń qurylysyna 127 mlrd.teńge ınvestıtsııa saldy. Ortalyq keler jyldyń qyrkúıek aıynda el ıgiligine tabystalady. Jańa jylý-elektr stantsııasy –táýelsizdik jyldaryndaǵy ınvestor qarjysyna boı kótergen eń aýqymdy, teńdessiz joba. Qurylys barysy Prezıdentimiz ben Úkimettiń tikeleı baqylaýynda», — dedi N.Nálibaev.