Qyzylorda qalasynda táýlik boıy jumys isteıtin kitaphana ashylýy múmkin

ASTANA. KAZINFORM – Qasym-Jomart Toqaev Qyzylorda oblysyna jumys sapary barysynda óńir jurtshylyǵymen kezdesip, áńgimelesti. 

Prezıdent aımaqtyń qarqyndy damyp kele jatqanyna toqtalyp, aldaǵy ýaqytta da aýqymdy jumys atqarylatynyn aıtty. Sondaı-aq birqatar másele boıynsha pikirimen bólisti.

– Dúnıe júzindegi ahýal barshańyzǵa jaqsy málim. Álemdegi jaǵdaı bulyńǵyr, qubylmaly. Sondyqtan, eń aldymen, jastarǵa kóńil aýdarý qajet. Jastarymyz – daryndy, qabiletti. Olarǵa durys baǵdar kórsetip, jaqsy tárbıe, tálim berý mańyzdy. Qazirgi zamanda esirtki, nashaqorlyq sekildi syn-qaterler az emes. Jastardyń bolashaǵy – bilimde. Oıy ushqyr, kókiregi oıaý, kózi ashyq jastar – bizdiń keleshegimiz. Bárimiz bir ult bolyp, el úshin, halyq úshin jumys isteýimiz kerek, – dedi Prezıdent.

Memleket basshysy elimizdi órkendetý jolynda qolǵa alynǵan bastamalar jóninde áńgimeledi.

– «Taza Qazaqstan» aktsııasy keń aýqymda júrgizilýde. «Taza» degen – jaqsy sóz. Eń aldymen, arymyz, nıetimiz taza bolýy kerek. Jalpy Qazaqstan taza bolýy qajet. Bul – bolmysymyzǵa áser etetin úlken is. Ekinshi, tsıfrlyq memleket qurý. Zamanaýı, ozyq elge aınalýymyz kerek. Áıtpese damyǵan elder kóshinen qalyp qoıamyz. Sondyqtan tsıfrlandyrýdy, jasandy ıntellektini mindetti túrde damytý qajet. Qazaqstanda Ortalyq Azııadaǵy alǵashqy sýperkompıýter iske qosyldy. Budan bólek, atom stansalaryn salýymyz kerek. Qazir birinshi stansanyń qurylysy bastaldy. Taıaý arada ekinshi AES jobasyn qolǵa alamyz, – dedi Memleket basshysy.

Prezıdent óńir úshin sý tapshylyǵy óte ózekti másele ekenin jetkizdi.

– Sý tapshylyǵyna basa nazar aýdaramyz. Keleshekte de sý mol bolady deı almaımyz. Oǵan daıyn bolýymyz kerek. Sý únemdeýdiń joǵary tehnologııasyn qoldanǵanymyz jón. Memleket sýbsıdııa berip jatyr. Bıyl aýyl sharýashylyǵyna 1 trıllıon berdi. Bul – úlken múmkindik, – dedi Memleket basshysy.

Qasym-Jomart Toqaev mádenıet, óner salasyna mán beretinine toqtaldy. Astana men Almaty qalalarynda táýlik boıy qyzmet kórsetetin eki birdeı Prezıdenttik kitaphana salynyp jatqanyn jetkizdi. Bolashaqta osy sekildi úshinshi kitaphana Qyzylorda qalasynda ashylýy múmkin ekenin aıtty.

Aıta keteıik, Prezıdent Nurlybek Nálibaevqa ınvestıtsııalyq klımatty jaqsartý baǵytynda birqatar tapsyrma berdi.