Qyzylordada kene shaqqan 45 adam medıtsınalyq kómekke júgindi

QYZYLORDA. KAZINFORM — Bıyl epıdemıologııalyq merzim bastalǵaly Qyzylorda qalasynda keneden zardap shegip, medıtsınalyq kómekke 45 adam júgindi. Bul ótken jyldyń osy kezeńimen salystyrǵanda 40%-ǵa joǵary.

Qyzylorda qalasy Kongo-Qyrym gemorragııalyq qyzbasynyń tabıǵı oshaǵynda ornalasqan. Sondyqtan jyl saıyn epıdemıologııalyq maýsymda aýrýdyń aldyn alý, zalalsyzdandyrý jumysy kúsheıtiledi. 

— Qala boıynsha 8 eldi meken qolaısyz dep tanyldy. Ótken jyly olardyń sany 12 bolatyn. Kóktemgi epıdmaýsymda 407 gektar aýmaq zalalsyzdandyrylady, — dedi ulttyq saraptama ortalyǵy Qyzylorda oblysy boıynsha fılıalynyń dırektory Farıda Ydyrysqyzy.

Dezınfektsııa jumysynyń alǵashqy kezeńi 9-21 sáýir aralyǵynda, ekinshi kezeńi 18-30 sáýir aralyǵynda júrgiziledi. 

— Ótken jyly Kongo-Qyrym gemorragııalyq qyzbasynyń 6 jaǵdaıy tirkeldi. Onyń 3-i klınıkalyq jáne zerthanalyq turǵyda rastaldy, — dedi Qyzylorda qalalyq sanıtarııalyq — epıdemıologııalyq baqylaý basqarmasy basshysynyń mindetin atqarýshy Beıbit Bıdash.

2024 jyly oblys boıynsha 115 eldi meken qolaısyz dep tanylsa, bıyl olardyń sany 111-ge azaıdy. Bıyl 9 sáýirde kenege qarsy zalalsyzdandyrý jumysy bastalady.