Qyzylorda qalasynda bıyl qandaı kósheler jóndeledi
QYZYLORDA. KAZINFORM — Tolassyz jańbyr jaýǵan kúnderi Qyzylorda qalasy turǵyndarynyń tarapynan áleýmettik jelide shetkeri kóshelerge sý jınalyp, tipti balshyqtan aıaq alyp júrý qıyndap ketetini týraly shaǵym kóbeıdi.
Kazinform tilshisiniń osy máselege baılanysty suraǵyna qala ákimi Nurjan Ahatov jaýap berdi.
— Jańbyr jaýǵan kezderi ondaı máseleler boldy. Biraq kommýnaldyq sala qyzmetkerleri kún-tún demeı jumys istep jatyr. Sýdy múmkindiginshe bir-eki kúnde arnaıy tehnıkanyń kómegimen tartyp alýǵa tyrysady. Jaýyn-shashyndy kúnderi birinshi kezekte ortalyq kóshelerge basymdyq beriletini ras. Sodan keıin shet aımaqtarǵa aýysamyz. Halyqtyń shaǵymy osydan týyndaıdy. Qalanyń shetkeri bóliginde másele baryn áleýmettik jeli arqyly bilip, baqylap otyrmyz. Mundaı kóshelerge negizinen halyqtyń júrýine yńǵaıly etip tas tóseledi, — dedi ol.
Jergilikti bılik ortalyqqa ǵana emes, kentter men aýyldardaǵy, shet aımaqtardaǵy joldardyń sapaly bolýyna basymdyq berip otyr.
— Ótken jyly Báıterek, Shanhaı, Tıtov, KBI, Saıahat shaǵyn aýdandaryndaǵy 35 kóshege asfalt, Edelveıs, ıAgodka saıajaılarynyń 20-ǵa jýyq kóshesine tas tóseldi. Sondaı-aq kópqabatty úılerdiń (Aqmeshit, 3-irilendirilgen kvartal, Astana-1, 2, Araı-3, Toqmaǵambetov, № 3 úı) aýlaishilik joldary jańartyldy. Halyq qatysatyn bıýdjet jobasy arqyly uzyndyǵy 4 shaqyrym 7 kóshege jaıaý júrginshiler joly salyndy. Bul baǵyttaǵy is-sharalardy bıyl da jalǵastyramyz. Nazarbaev dańǵylynyń Baımahanov kóshesinen bastap Tasbóget kentine deıingi aralyǵyn qaıta jańǵyrtyp, kúrdeli jóndeýden ótkizemiz. Bul jumystyń qataryna Tasbóget kentindegi Imanov, Bozǵul-1, Naýryz jáne Esenov kósheleri endi. Sondaı-aq, Baımahanov pen Shámenov kóshesiniń aralyǵyna deıingi Spanov kóshesin de qaıta jańǵyrtamyz, — dedi Nurjan Ahatov.
Táýelsizdikke — 25 jyl dańǵyly Mahanbetov kóshesine jalǵasyp, Maral Ishan kóshesiniń kireberis qaqpaǵa deıingi aralyǵy jańa keıipke enbek. Qala basshylyǵy bul jobalar úshin memlekettik saraptama qorytyndysyn kútip otyr.
— 2 mlrd 659 mln teńgege kent jáne aýyldyq okrýgterdiń 29 kóshesine qaıta jańǵyrtý, ortasha jóndeý jumysy júrgiziledi. Tizimde Belkól kentindegi ortalyq kóshe, Tasbóget kentindegi Shoqaı, Oljabaıuly, Ábenov, Abaı, Qyzyljarma aýyldyq okrýgindegi Naqypuly, Dildebaev, Almaǵanbetov, Abdýlov kósheleri, Meıirmanov, Altyqulash, Qarataý, Tereńsaı, Qaraaryn, Tósbulaq, Kúrkireýik, Terisaqpaı, Aqsýat aýyldyq okrýgindegi Baıten, Jónbaev, Sarykól, Úsenbaev, Ábıev, Jańaturmys, Qyryqbaıtaq, № 10 «V», Álimov, Qarataev, Qyzylózek aýyldyq okrýgindegi Qaraózek beketi — 4, Qunanbaev kósheleri bar, — dedi qala ákimi.
Buǵan deıin Almaty ákimdigi jol-kólik ınfraqurylymyn damytý baǵytynda bıyl qala kóshelerin uzartýǵa erekshe nazar aýdaryp otyrǵanyn atap ótken edik.