Qyzylorda qalasynda 20 jylda 272 beınebaqylaý kamerasy ornatyldy
QYZYLORDA. KAZINFORM — Qyzylorda qalasyndaǵy oblystyq polıtsııa departamentiniń jedel basqarý ortalyǵy 2006 jyly qurylǵan.
Oblys ákimdiginen habarlaǵandaı, odan beri kezeń-kezeńimen 272 beınebaqylaý kamerasy ornatyldy, jumys istep tur.
— 2024 jyly aýdan ortalyqtaryndaǵy osyndaı ortalyqtarǵa kelip túsetin aqparattardy qabyldaý men tirkeý avtomattandyryldy. Oǵan 2 mlrd 240 mln teńge bólinip, 539 beınebaqylaý kamerasy men 49 statsıonarly jyldamdyq ólshegish qurylǵy ornatylyp, iske qosyldy.
Qyzylorda qalasyna qosymsha 1400 beınebaqylaý kamerasyn jáne 20 meken-jaıǵa 80 zııatkerlik qıylys, 58 meken-jaıǵa 96 statsıonarly jyldamdyq ólshegish qondyrǵy, jasandy ıntellekt fýnktsııasy bar beıneanalıtıkalyq júıe ornatýǵa, ortalyqty qaıta jańǵyrtýǵa jergilikti bıýdjetten 4,5 mlrd teńge bólinip, kelisimshart jasaldy, — delingen habarlamada.
Qazirgi kezde beınebaqylaý kameralary ıntegratsııalandy, aldaǵy ýaqytta tolyq iske qosylady. Statsıonarlyq jyldamdyq ólshegish qurylǵylar «ERAP» júıesine qosylyp, jumysyn bastap ketti. Qyzylorda oblysy boıynsha «Kómek-112» jáne «Kómek-109» avtomattandyrylǵan aqparattyq júıelerin Bas prokýratýranyń «Tsıfrlyq qadaǵalaý» biryńǵaı aqparattyq-taldaý júıesimen ıntegratsııalaý tolyq aıaqtaldy.
— 2021 jyldan beri 112 nómirli biryńǵaı kezekshilik-dıspetcherlik qyzmeti 24/7 rejıminde 101, 102, 103, 112 nómirli shuǵyl qyzmet qońyraýyn qabyldap keledi. «Kómek-112» júıesine 2021-2026 jyldar aralyǵynda 1 263 173 qońyraý tirkelgen.
2020 jyldan beri Qyzylorda qalasynda, al 2023 jyldan beri oblys aýmaǵynda 109 biryńǵaı nómiri arqyly kommýnaldyq máseleler boıynsha ótinishter qabyldanady. Avtomattandyrylǵan aqparattyq júıege 856 549 qońyraý túsken, — delingen ákimdik habarlamasynda.
Buǵan deıin Almaty oblysynyń polıtsııa departamenti jol qaýipsizdigin arttyrý maqsatynda kólik quraldarynyń ortasha jyldamdyǵyn tirkeý júıesin engizilip jatqanyn málimdedi.
