Qyzylorda qalasynan bir jylda 93 myń tonnaǵa jýyq qoqys shyǵaryldy
QYZYLORDA. KAZINFORM – «Qyzylorda tazalyǵy» mekemesi oblys ortalyǵyndaǵy kópqabatty turǵyn úılerden, jeke sektorlar men kásipkerlik nysandarynan shyqqan turmystyq qatty qaldyqty arnaıy tehnıka kómegimen jınap, polıgonǵa tógýmen aınalysady.
Mekemeniń baspasóz qyzmeti taratqan málimetke súıensek, munda 270 jumysshy, 57 arnaıy tehnıka qala tazalyǵyna turaqty túrde jumyldyrylǵan.
– Ótken jyly qaladan 462 myń tekshe metr kóleminde nemese 93 myń tonnaǵa jýyq qoqys shyǵaryldy. Qazirgi tańda mekeme qyzmetin 1359 abonent turaqty túrde tutynyp otyr, - delingen habarlamada.
Al tazalyq tártibin buzǵandarǵa 21,3 mln teńge shamasynda aıyppul salynǵan. Qys mezgilinde mekeme qyzmetkerleriniń jumysy kúsheıedi. Qar tazalaý, kóktaıǵaqqa qarsy qospa sebý, kóshe tazartý jáne jol boıyndaǵy qaldyqtardy shyǵarý isine 60-qa jýyq tehnıka saılandy. Ózge de tehnıkalar qysqy rejımge beıimdelip, qajetti janar-jaǵarmaı jáne qosalqy bólshektermen qamtamasyz etildi.
Buǵan deıin biz byltyr Astana qalasynda 328 zańsyz qoqys úıindileri joıylyp, 120 myń tonnadan astam qaldyq shyǵarylǵanyn jazǵanbyz.
Qala kóshelerin muz basý men kóktaıǵaqtan qorǵaýǵa 2 500 tonnaǵa jýyq qum men tuz aralasqan arnaıy qospa daıyndaldy. Sonymen qatar qys mezgilinde úzdiksiz qyzmet atqaratyn 100-ge jýyq qyzmetker ár ýchaskege bólinip, kezekshilik kestesine sáıkes jumys isteıtin bolady.
Qala ákimi Nurjan Ahatov mekemeniń daıyndyǵyn kórip, jaýapty sala jetekshilerine qysqy maýsymǵa jumysty uıymdastyrýda tártip pen jaýapkershilikti arttyrýdy tapsyrdy.