Qyzylorda qalasy turǵyndary ystyq sý qyzyǵyn qashan kóredi
Qyzylorda turǵyndary qolyn qashan jyly sýǵa malady. Bul týraly «Jibek Joly» telearnasynyń «Ýáde» baǵdarlamasyna suhbat bergen Qyzylorda oblysynyń ákimi Nurlybek Nálibaev aıtty, dep habarlaıdy Kazinform.
«Prezıdent óńirge kelgen kezde qala turǵyndarynyń ótinishin jetkizdim. Ol úlken másele — Qyzylorda qala bolǵaly jyly sý joq. Kókshetaýda da osy másele ózekti bolyp tur. Basqa óńirdiń bárinde bar. Arıstonnyń kómegimen sý jylytyp paıdalanady. Turǵyndardyń osy ótinishin Memleket basshysyna jetkizdim. Prezıdent Úkimetke ákimshilikpen birlesip, tezdetip joba jasaýǵa tapsyrma berdi. Memleket basshysynyń úlken qoldaýymen kelesi jylǵa 11,5 mlrd, 2025 jylǵa 11,45 mlrd teńge bólineıin dep jatyr. 2 jyldyń ishinde Qyzylorda qalasyn jyly sýmen qamtamasyz etemiz. Bul Qasym-Jomart Kemeluly qabyldaǵan úlken tarıhı sheshim boldy», — dedi Nurlybek Nálibaev.
Sonymen qatar ol «Batys Qytaı — Batys Eýropa» jolynyń Qyzylorda oblysynyń 5 aýdany aýmaǵynan ótetin 566 shaqyrymy eki jolaqty ekenin, osy máseleni de Prezıdentke jetkizgenin aıtady.
«Qyzylordadan Túrkistanǵa deıin, Túrkistannan Almatyǵa deıin bul jol 4 jolaqty, birinshi sanatty bolyp eseptelinedi. Al Aqtóbe oblysyna deıin 2-sanatty. Onyń boıynda 5 aýdanymyz ornalasqan. Bul ýchaskede jol apaty jıi bolyp jatyr, adam shyǵyny da kóp. Kúnine 10 myń kólik qatynaıdy. Óńirimizdiń ǵana emes, Reseıdiń, Eýropanyń qanshama kóligi júk tasymaldaıdy. Osy máseleni de kóterip, Memleket basshysyna jerlesterimizdiń ótinishin jetkizdim. Prezıdent Úkimetke atalǵan ýchaskeni 1-sanatqa aýystyrýǵa, aldaǵy 2-3 jyldyń ishinde salyp bitirýge tapsyrma berdi», — dedi óńir basshysy.
