Qyzylorda qalalyq bilim bóliminiń burynǵy basshysy para alǵany úshin sottaldy
QYZYLORDA. KAZINFORM - Qyzylorda oblystyq sotynyń baspasóz qyzmeti Qyzylorda qalalyq bilim bóliminiń burynǵy basshysynyń para alǵany úshin sottalǵanyn málimdedi.
- Qyzylorda qalasynyń №2 sotynda sottalýshyǵa qatysty qylmystyq is qaraldy. Sottalýshy memlekettik fýnktsııalardy oryndaýǵa ýákilettik berilgen adam bola tura pedagog-uıymdastyrýshy laýazymyna jumysqa ornalastyryp bergeni úshin 500 000 teńge aqshany qolma-qol alǵan. Budan keıin ony úıine shaqyryp, bastapqyda suraǵan 1 000 000 teńgeniń qalǵan 500 000 teńgesin alǵan», - delingen habarlamada.
Sot úkimimen sottalýshy Qylmystyq kodekstiń 366-babynyń 2-bóligimen kináli dep tanyldy. Oǵan memlekettik qyzmette, sýdıa qyzmetin, jergilikti ózin-ózi basqarý organdarynda, Qazaqstan Respýblıkasynyń Ulttyq bankinde jáne onyń vedomstvolarynda, qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organda, memlekettik uıymdarda jáne kvazımemlekettik sektor sýbektilerinde laýazymdardy atqarý quqyǵynan ómir boıy, bas bostandyǵynan 3 jylǵa aıyrý jazasy taǵaıyndaldy.
Habarlamada kórsetilgendeı, Qylmystyq kodekstiń 46-baby 5-bóliginiń 2-tarmaǵyna sáıkes jazasyn qylmystyq-atqarý júıesiniń qaýipsizdigi ortasha mekemelerinde óteý belgilengen. Úkim zańdy kúshine engen joq.
Al jaqynda Jambyl oblysynda para alǵany úshin Ekologııa departamentiniń basshysy sottaldy.