Qyzylorda halqy negizinen oblys jáne aýdan ortalyqtarynan jer telimin alýǵa yntaly
QYZYLORDA. KAZINFORM — Qyzylorda oblysynda jer kezeginiń jyljýy jónindegi aqparat júıelenbegen. Oblystyq aýyl sharýashylyǵy jáne jer qatynastary basqarmasy munymen aınalyspaıtynyn málimdedi. Kazinform tilshisiniń resmı saýalyna Qyzylorda qalasy men jeti aýdannyń ákimdikteri jaýap berdi.
Oblystyń soltústiginde ornalasqan qos aýdannyń biri — Aralda jeke turǵyn úı qurylysy úshin jer ýchaskesi Aral qalasy men Sekseýil, Jaqsyqylysh kentterinde retimen tabystalyp jatyr. Qalǵan aýyldyq okrýgterde kezek qalyptaspaǵan.
— Aral qalasynda elektrondy kezek bastalǵaly beri 9838 adam kezekke tursa, 2025 jyly sonyń 46-syna jer telimi tabystalǵan. 2026 jyldyń basynan beri bıylǵa josparlanǵan 419 jer ýchaskesiniń 106-sy tabystaldy. 2022 jyldan osy kezge deıin 623 jer ýchaskesi tabystalǵan. Sekseýil kenti boıynsha elektrondy kezek bastalǵaly 913 adamnyń 2025 jyly 25-ine, bıyl 3-ine jer ýchaskesi, Jaqsyqylysh kenti boıynsha 2024 jyly 553 adamnyń 146-syna jer ýchaskesi tabystalǵan, — delingen habarlamada.
Qazaly aýdanynda on sotyq úshin kezek negizinen Ǵanı Muratbaev aýyldyq okrýgi, Áıteke bı kenti men Qazaly qalasynda túzilgen. Aýdan ákiminiń baspasóz qyzmeti habarlaǵandaı, Ǵanı Muratbaev eldi mekeniniń 614 turǵyny kezekte tur. Degenmen, elektrondy kezek bastalǵaly birde-bir jer berilgen joq. Óıtkeni gaz, aýyzsý, jaryq tartylǵanymen jol salynbaǵan.
— 2007-2022 jyldar aralyǵynda Áıteke bı kenti boıynsha 9969 ótinish tirkelgen. Elektrondy kezek bastalǵannan 2025 jylǵa deıin bazanyń jumys istemeýine baılanysty bıyl qansha adam tirkelgeni belgisiz. Qazaly qalasynda 2022 jyldan bastap 1282 adam, 2025 jyldyń basynda 2868, 2026 jyldyń osy kúnine deıin 3277 adam kezekke turdy. Qazirgi tańda qala aýmaǵynda jer ýchaskesin tabystaý úshin ınfraqurylym tartý jumysy istelip jatqan joq. Sońǵy ret 2020-2021 jyldary Qazaly qalasy aýmaǵynan 474 azamatqa jer ýchaskesi tabystalǵan, — delingen ákimdik jaýabynda.
Statıstıkadan jergilikti turǵyndardyń túgel derligi aýdan ortalyqtarynan jer telimin alýǵa yqylas bildirgenin baıqaımyz. Qarmaqshy aýdanynyń ortalyǵynan 2016 jyly 25, 2017 jyly 363 adamǵa on sotyqtan bólingen. Odan keıin eshqandaı qozǵalys joq. Jalaǵash aýdanynda elektrondy kezek 2022 jyly bastalǵan, sodan beri 964 adam úles alýǵa tilek bildirgen. Byltyr 11, bıyl 2 jer ýchaskesi ıelerine tabys etilgen. Shıeli kentinde jeke turǵyn úı úshin 2023 jyly 216, 2024 jyly 183, 2025 jyly 161 jer telimi berilgen. Jańaqorǵan kentinde kezekte turǵandar sany — 12 286. Búgingi kúni 2015 jyly tirkelgenderge jer berile bastady. 2025 jyly 33 turǵyn úı salý múmkindigine ıe boldy.
— Jyl basynda 40 adamnyń tizimi jasaqtalyp, bıyl 3 aıda onyń 5-i kelisim berdi. Qalǵan azamattarǵa kent aýmaǵyndaǵy osyǵan deıin ózge tulǵalarǵa tabystalyp, alaıda maqsatyna saı paıdalanbaı, 3 jyl merzimi ótken, stadıon aýmaǵynan buryn ınfraqurylymy júrgizilgen bos jer ýchaskeleri usynylyp otyr, — delingen habarlamada.
Aýdan ákimdikteri aýyldarda jer alýdyń asa qıyndyǵy joǵyn alǵa tartty. Óńirde kezektiń basym bóligi Qyzylorda qalasynda qalyptasqan — 70949 adam.
— 2021 jyldan bastap elimizde jeke turǵyn úı qurylysy úshin jer kezegine turý protsesi tolyq elektrondy formatqa kóshirildi. Bul turǵyndardyń kezekke tirkelýin aıtarlyqtaı jeńildetti. 2021-2026 jyldar aralyǵynda elektrondy júıe arqyly 11170 adam kezekke tirkelgen, — delingen qalalyq aýyl sharýashylyǵy jáne jer qatynastary bóliminiń habarlamasynda.
Bıyl 2006 jyldyń alǵashqy jartysynda kezekke turǵan qala turǵyndarynyń aldy jyljyp jatyr.
Buǵan deıin biz Atyraý oblysynda 180 myńnan asa adam jer kezeginde turǵanyn, bıyl 900 jer ýchaskesin berý josparlanyp otyrǵanyn jazǵan edik.
Eske salsaq Qyzylordada 20 jyl kezek kútkenderge jer berile bastaǵan edi.
