Qyzylorda fýtbol klýbynyń jańa ıesi qordalanǵan qaryzdy jaba ma

QYZYLORDA. KAZINFORM – Qyzylordalyq «Qaısar» fýtbol klýby bıyl eshbir legıonersiz  qazaqstandyq oıynshylarmen jasaqtaldy. Al 30 qazannan bastap jeke basqarýǵa ótti. 

Biraq fýtbol jankúıerleriniń kókeıinde «klýbtyń jańa ıesi «TAU Group LTD» kompanııasynyń basshysy Islamǵalı Qozbaqov «Qaısardyń» qordalanǵan qaryzyn jaba ma?» degen suraq qaldy. Buǵan oblystyq Dene shynyqtyrý, sport jáne týrızm basqarmasynyń basshysy Baqtııar Artaev jaýap berdi.

- «Qaısardyń» jalaqy boıynsha bereshegin jabý jóninde bıýdjettik ótinim berdik. Ol bıyl nemese kelesi jyly oblystyq bıýdjet esebinen jabylady. Al merdigerlerdiń qaryzyna qatysty ınvestorlarǵa usynys berip jatyrmyz, - dedi basqarma basshysy. 

Klýbtyń legıonersiz oınaýy óz fýtbolshylarymyzdyń jasyl alańdaǵy bar múmkindigin kórsetýge jol ashty. «Qaısar» osylaısha bıylǵy maýsymda 22 upaı jınap, jalpy eseptik kestede 11-orynǵa turaqtady. 

- Jeke kásipkerdiń qolyna ótken soń «Qaısar» fýtbol klýbynyń jumysyna aralasa almaımyz. Legıoner alsa da erki ózinde. Ony josparyna da qosqan. Táýir oıynshylar alyp jatyr, sondyqtan jaqsy oıyn kórsetedi degen senimdemin. Jekege ótse de, úzdikter qatarynan kóriný týraly maqsat qoıyp otyrmyz, - dedi Baqtııar Artaev. 

Klýbtyń jańa basshysy aldaǵy ýaqytta «Qaısar» akademııasyn salýǵa jáne ınfraqurylymyn damytýǵa 12 mlrd teńge kóleminde ınvestıtsııa salýdy josparlap otyr. 

Eske salaıyq, Prezıdent bıylǵy Joldaýynda fýtbol klýbtaryn jekeshelendirýge qatysty jumysty jedeldetýdi tapsyrǵan bolatyn.