Qyzylorda fýtbol klýbynyń bapkeri aýysty

QYZYLORDA. KAZINFORM – Qyzylorda oblysynyń «Qaısar» fýtbol klýbyn jańa maýsymda tájirıbeli maman Andreı Ferapontov jattyqtyrady. Bul týraly klýbtyń baspasóz qyzmeti habarlady.

Andreı Ferapontov Premer-lıgada ózindik qoltańbasyn qaldyrǵan. 

— Ol bas jattyqtyrýshy laýazymyn «Maqtaaral» fýtbol klýbynda bastap, «Oqjetpes» komandasynda jalǵastyrdy. Sondaı-aq «Aqtóbe», «Ordabasy», «Qaırat», belarýstik «Rýh» komandalarynyń bapkerlik shtabynda abyroıly qyzmet atqarǵan. Qurama deńgeıinde de tájirıbesi jetkilikti. Búginde Qazaqstan jastar quramasynyń bas bapkeri mindetin atqaryp júr, — delingen habarlamada. 

Al 3 maýsym boıy qyzmet atqarǵan jattyqtyrýshy Vıktor Kýmykov kelisim shart merziminiń aıaqtalýyna baılanysty «Qaısar» fýtbol klýbyndaǵy jumysyn aıaqtady.

Eske salsaq, Qyzylorda oblysynyń «Qaısar» fýtbol klýby 2025 jyldyń 30 qazanynan bastap resmı túrde «TAU Group LTD» kompanııasynyń basshysy Islamǵalı Qozbaqovtyń jeke basqarýyna berildi.