Qyzylorda bıligi jekemenshikke ótken fýtbol klýbyn qarjylandyrýdy nege toqtatpaı otyr
QYZYLORDA. KAZINFORM — Telegram áleýmettik jelisinde qyzylordalyq «Qaısar» fýtbol klýby jóninde jazba tarady. Onda klýb jekemenshikke ótse de komandanyń daıyndyǵy men chempıonatqa qatysýy úshin bıýdjetten qarjy bólinetini keltirilgen.
Kazinform tilshisiniń osy máselege baılanysty saýalyna oblystyq sport jáne týrızm basqarmasy jaýap berdi.
Prezıdent tapsyrmasyna sáıkes «Qaısar» fýtbol klýby 2025 jyly 30 qazanda jeke basqarýǵa berildi. Klýbtyń jańa ıesi — jergilikti kásipker Islamǵalı Qozbaqov.
— Klýbty kommertsııalandyrý baǵyty aıasynda ınvestormen kelisim jasalyp, birqatar naqty talap qoıyldy. Atap aıtqanda, ınvestor halyqaralyq standarttarǵa saı zamanaýı fýtbol akademııasy men oqý-jattyǵý bazasyn salýdy óz mindetine aldy. Akademııada fýtbolshylarǵa arnalǵan medıtsınalyq ortalyq, 8 ashyq fýtbol alańy, jabyq manej bolady. Syrttan keletin komandalarǵa arnalǵan qonaqúı salýy tıis. Investor klýbty damytýdyń bekitilgen strategııalyq josparyn tolyq oryndaýǵa mindetti. Osy talaptar oryndalǵan jaǵdaıda klýbty qoldaý maqsatynda memlekettik bıýdjetten qarjylandyrý tıisti merzim aıaqtalǵanǵa deıin qarastyrylady, — delingen vedomstvo jaýabynda.
Fýtbol klýbyn qarjylandyrýǵa byltyr oblystyq bıýdjetten 1,2 mlrd teńge bólindi. 2026 jylǵy kórsetkish — 995 mln teńge. Basqarma basshylyǵy memleket tarapynan bólinetin qarjy kólemi jyl saıyn kezeń-kezeńimen qysqartylatynyn málimdedi. Tıisti merzim aıaqtalǵasyn klýb ózin-ózi tolyqtaı qarjylandyrady dep josparlanyp otyr.
— 2025 jyly resmı túrde ashylǵan 11 myń oryndyq Kaysar Arena stadıony senimgerlik basqarýǵa berildi. Investor tarapynan aldaǵy eki jyl ishinde fýtbol akademııasyn salýǵa 16 mlrd teńgeden astam jeke qarajat baǵyttalady. Negizgi komandany jasaqtaýǵa, sondaı-aq stadıondy paıdalaný men kútip-ustaýǵa jyl saıyn 1 mlrd teńgeden astam qarjy bólinip, bul ınvestıtsııa kólemi aldaǵy jyldary kezeń-kezeńimen ulǵaıtylady, — delingen habarlamada.
Basqarma osy oraıda «Qaısar» fýtbol klýby Qazaqstan Respýblıkasynyń ótken jylǵy Premer-lıgasynda týrnırlik kestede 11-orynǵa turaqtap, legıonerlersiz-aq laıyqty ári básekege qabiletti nátıjeler kórsetkenin qaperge saldy. Bul bastama otandyq fýtboldy júıeli túrde damytýǵa, jergilikti talanttardy qoldaýǵa, kásibı basqarý qaǵıdattaryn engizýge jáne bıýdjet qarajatyn tıimdi paıdalanýǵa baǵyttalǵan mańyzdy ári strategııalyq qadam bolatynyna senim bildirip otyr.
Aıta keteıik, buǵan deıin «Qaısar» fýtbol klýbynyń baqylaý keńesi jasaqtaldy.