Qyzylorda aýrýhanasyndaǵy náreste ólimine baılanysty qylmystyq is qozǵaldy
QYZYLORDA. KAZINFORM – Qyzylorda qalasyndaǵy aýrýhanada eki aılyq náreste qaıtys boldy.
Oblystyq Polıtsııa departamenti medıtsına qyzmetkeriniń óz mindetterin tıisinshe oryndamaýy saldarynan abaısyzda adam ólimine ákep soǵý deregi boıynsha qylmystyq is qozǵalǵanyn málimdedi.
- Qazirgi ýaqytta istiń barlyq mán-jaıyn obektıvti ári jan-jaqty anyqtaýǵa baǵyttalǵan qajetti tergeý áreketteri bastaldy. Qylmystyq isti tergeý barysy departamenttiń baqylaýynda, - delingen habarlamada.
Oblystyq densaýlyq saqtaý basqarmasynyń habarlaýynsha, bala jedel járdem brıgadasy arqyly kópbeıindi oblystyq balalar aýrýhanasyna jetkizilip, tıisti medıtsınalyq kómek kórsetilgen.
- Respýblıkalyq klınıkalyq ortalyq mamandary em barysynda balaǵa birneshe ret telemedıtsınalyq keńes ótkizgen. Atalǵan jaǵdaı boıynsha tekserý jumysy júrip jatyr, - delingen basqarma habarlamasynda.
Budan buryn Baıqońyr qalasynda terezeden qulap ketken bala aýrýhanada kóz jumǵan bolatyn.
