Qyzylorda áýejaıynyń jańa termınaly ashyldy
ASTANA. KAZINFORM - Memleket basshysynyń tapsyrmasy boıynsha Premer-mınıstr Oljas Bektenov Qyzylorda qalasyndaǵy «Qorqyt Ata» áýejaıynda jańa termınaldyń ashylýyna qatysty. Bul týraraly Úkimettiń baspasóz qyzmeti habarlady.
Bıznestiń áleýmettik jaýapkershiligi sheńberinde iske asyrylǵan joba óńirdiń saýda-ekonomıkalyq, týrıstik áleýetin damytýǵa jáne halyqtyń turmys sapasyna tikeleı áser etetin kólik qyzmetteriniń qoljetimdiligin qamtamasyz etýge yqpal etedi. Jańa termınaldy iske qosý áýe aılaǵynyń ótkizý múmkindigin 7 esege – jylyna 300 myńnan 2 mln jolaýshyǵa deıin arttyrady. Jańartylǵan «Qorqyt Ata» termınaly Halyqaralyq áýe kóligi qaýymdastyǵynyń (IATA) jáne Halyqaralyq azamattyq avıatsııa uıymynyń (ICAO) joǵary standarttaryna sáıkes keledi.
«Memleket basshysy halyqqa Joldaýynda kólik-logıstıkalyq sektordy damytýdy strategııalyq basymdyq dep atady. «Qorqyt Ata» áýejaıynyń jańa termınaly – óńir úshin ǵana emes, búkil Qazaqstan úshin mańyzdy ınfraqurylymdyq joba. Ony iske asyrý qosymsha áýe baǵyttardy, onyń ishinde halyqaralyq baǵyttardy ashýǵa, tranzıttik áleýetti, jolaýshylar men júk aǵynyn ulǵaıtýǵa múmkindik beredi, bul ishki týrızmniń, saýdanyń jáne tutastaı ekonomıkanyń damýyna oń áser etedi. Úkimet bıznestiń zamanaýı, sapaly kólik-logıstıkalyq ınfraqurylymdy salý jónindegi áleýmettik baǵdarlanǵan bastamalaryn tolyq qoldaıtyn bolady – bul bizdiń elimizdiń bolashaǵyna qosylǵan úles»,— dep atap ótti Oljas Bektenov jáne jobanyń iske qosylýyn qysqa merzimde qamtamasyz etkenderdiń barlyǵyna alǵysyn bildirdi.
Úkimet basshysy ishki jáne halyqaralyq reısterdiń jolaýshylaryna qyzmet kórsetý úderisimen tanysty. Aýdany 7 500 sharshy metr termınal teleskopııalyq baspaldaqtar, qol júgin tekserýdiń avtomattandyrylǵan júıesi jáne basqa da ozyq tehnologııalarmen jabdyqtalǵan. Jobany iske asyrýǵa Bolat Ótemuratov qory áleýmettik jaýapkershilik sheńberinde 20,9 mlrd teńge ınvestıtsııa saldy. Jergilikti bıýdjetten ınjenerlik-kommýnıkatsııalyq ınfraqurylymǵa, avtojol salýǵa, áýejaı aýmaǵyn abattandyrýǵa jáne jaryqtandyrýǵa 4,3 mlrd teńgeden astam qarajat bólindi.
«Qorqyt Ata» Áýejaıy» AQ basqarma tóraǵasy Baıan Ajmoldaev óńirdegi jyl saıyn ósip kele jatqan jolaýshylar aǵynyn eskere otyryp, termınaldyń ýaqtyly iske qosylǵany týraly habarlady. Máselen, bıylǵy 9 aıda áýejaıda 265 myń jolaýshyǵa qyzmet kórsetildi, bul ótken jyldyń sáıkes kezeńimen salystyrǵanda 20%-ǵa artyq. Aptasyna 26 ishki reıs júzege asyrylady (17-si Astanaǵa, 9-y Almatyǵa). Osy jyldyń maýsym aıynda Antalıa (Túrkııa) qalasyna halyqaralyq charterlik reıs iske qosyldy.
Qyzylorda oblysy ákiminiń birinshi orynbasary Danııar Janalınov Aqtaý jáne Atyraý qalalarynda qosymsha reıster ashý, sondaı-aq «Qyzylorda–Kókshetaý», «Qyzylorda–Aqtóbe», «Qyzylorda–Qaraǵandy» sııaqty áýe baǵyttardy áleýmettik mańyzy bar reıster tizbesine engizý jospary týraly baıandady.
Óńir jurtshylyǵy atynan sóz sóılegen Qyzylorda oblysy Ardagerler keńesiniń tóraǵasy Serik Dúısenbaev jańartylǵan áýejaıda jolaýshylardyń barlyq sanattary úshin jasalǵan qyzmet sapasy men qolaıly jaǵdaılardy jaqsartýdyń mańyzyna toqtaldy.
«Qyzylorda oblysy arqyly biz óńirlerdi memleket tarapynan qoldaý sharalarynyń oń nátıjelerin kórip otyrmyz. Búgin bizdiń jerlesterimizdiń armany oryndaldy – jańa áýejaı termınaly ashyldy. Memleket basshysyna óńirge erekshe kóńil bólgeni úshin alǵys bildirgim keledi, bul barlyq salada ósýge yqpal etedi», — dedi Serik Dúısenbaev.
