Qyzylorda áýejaıy vetnamdyq kompanııanyń basqarýyna berilýi múmkin

ASTANA. KAZINFORM — Qyzylordadaǵy qalalyq áýejaıyn vetnamdyq Sovico Group kompanııasynyń basqarýyna berý týraly kelissóz júrip jatyr. QR Syrtqy ister mınıstriniń orynbasary Álibek Baqaev málim etti.

— Biz ozyq tehnologııalardy, kompanııalardy tartyp jatyrmyz. Maqsat– olardyń tehnologııalyq jáne ákimshilik turǵydan bizge kómektesip, elimizdiń, sonyń ishinde áýejaılardyń qyzmetin jaqsartý. Qazir vetnamdyq tarappen kelissózder júrgizilip jatyr. Áńgime vetnamdyq taraptyń biraz ýaqytqa áýejaıdy basqarýyna qatysty bolyp otyr, bul áýejaı jumysynyń jalpy sapasyn arttyrý úshin jasalyp otyr, — dedi Álibek Baqaev Senat otyrysynan keıin ótken baspasóz máslıhatta. 

Sondaı-aq mınıstrdiń orynbasary áńgime Qyzylorda qalalyq áýejaıyna qatysty ekenin naqtylady. Aıta ketetini, áýejaı senimgerlik basqarýǵa berilýi múmkin, al satý máselesi qarastyrylmaıdy. 

— Bul satý emes. Biz strategııalyq nysandardy satpaımyz, — dep tolyqtyrdy Álibek Baqaev. 

Buǵan deıin vetnamdyq kompanııa elimizdegi áýejaılardyń birin satyp alýǵa nıetti ekeni týraly habarlaǵan edik. 

Sondaı-aq vetnamdyq ınvestor Qazaq Air áýe kompanııasynyń ataýyn ózgertti.

Aıta keteıik, 6 mamyrda Vetnam Kommýnıstik partııasy Ortalyq Komıtetiniń Bas hatshysy To Lam Qazaqstanǵa memlekettik saparmen keldi.