Qyzylorda áýejaıy alaıaqtardan saqtanýǵa keńes berdi

QYZYLORDA. KAZINFORM — Qyzylorda qalasynda ornalasqan halyqaralyq Qorqyt ata áýejaıynyń basshylyǵy alaıaqtyq qaýpi týraly eskertip, kópshilikke odan saqtanýǵa úndedi.

Málim bolǵandaı, belgisiz bireýler áýejaı atynan habarlasyp, «sálemdemeńiz keldi, tólem jasaý qajet» degen mazmunda jalǵan aqparat taratyp júr. 

— Atalǵan habarlamalar men qońyraýlar — alaıaqtyq áreketter. Qorqyt ata áýejaıy jeke tulǵalarǵa telefon arqyly habarlasyp, sálemdeme nemese júk úshin tólem talap etpeıdi. Azamattardan kúmándi qońyraýlar men habarlandyrýlarǵa senbeýdi, aqsha aýdarmaýdy jáne jeke derekterin bermeýdi suraımyz, — delingen habarlamada.

Eske salsaq, antıfrod júıeleriniń kómegimen elimizde 77 mıllıonnan astam alaıaqtyq qońyraý buǵattalǵan.