Qyzylorda arhıvterindegi qujattardyń 33 paıyzy tsıfrlandyryldy

QYZYLORDA. KAZINFORM - Búgin Qyzylorda qalasynda «Arhıv qujattaryn berý tártibi» taqyrybynda ekikúndik respýblıkalyq óńirlik semınar bastaldy.

Bul týraly oblystyq mádenıet, arhıvter jáne qujattama basqarmasynyń baspasóz qyzmeti habarlady. 

Mádenıet jáne aqparat mınıstrligi basqarmamen birlesip uıymdastyrǵan semınarǵa Almaty, Shymkent qalalarynyń, Jambyl, Túrkistan, Qyzylorda oblystaryndaǵy arhıv mekemeleriniń ókilderi, ony jınaqtaýshylar qatysty. 

Basqarma basshysy Janmurat Seıilov bul arhıv isin damytýdyń, qujattardy saqtaý, paıdalaný, tsıfrlyq formatqa kóshirý jáne qoljetimdi etý baǵytynda tájirıbe almasýdyń mańyzdy alańy ekenin atap ótti.

— Qyzylorda oblysynyń arhıv qorynda 811 558 saqtaý birligindegi qujattar saqtalǵan. Búgingi kúni onyń 33 paıyzy tsıfrlandyrylyp, «E-Arhıv» aqparattyq júıesine 195 qordyń 65 222 is-qujaty engizildi. «Elektrondyq qujat aınalymynyń biryńǵaı júıesi» aqparattyq júıesinen 2011-2021 jyldar aralyǵynda qalyptasqan elektrondyq qujattardy «E-Arhıv» júıesine mıgratsııalaý jumysy júrgizilip keledi. Búgingi kúni 1 606 283 qujattyń oryndalý kartochkasy toltyrylyp, 488 733 qujat aýysty, — dedi ol. 

Basqarma basshysy atap ótkendeı, keıingi 3 jylda arhıv salasyna 1 mlrd 841,4 mln teńge bólindi. Jergilikti arhıv mekemeleriniń aýdandarda jańadan ashylǵan Rýhanııat ortalyqtaryna kóshirilýi nátıjesinde apatty ǵımarattar máselesi sheshildi. Bul arhıv qoımalarynda 200 myń qujatty saqtaýǵa múmkindik berdi.

Semınar barysynda mamandar qoldanystaǵy normatıvtik-quqyqtyq aktilerdi tájirıbede qoldaný, vedomstvolyq deńgeıde jáne memlekettik arhıvterde qoımadan arhıvtik qujattardy berý boıynsha tájirıbe almasý máselelerin ortaǵa saldy. Respýblıkalyq is-shara erteń de jalǵasady. 

Aıta keteıik, erteń Májilistiń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine arhıv isi máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqyǵa salmaq.