Qyzylorda – Aqtóbe baǵytyndaǵy joldy tórt jolaqtyǵa keńeıtý jobasynyń birinshi kezeńi bastaldy
QYZYLORDA. KAZINFORM — Búgin Qyzylorda oblysynyń ákimi Nurlybek Nálibaev, «QazAvtoJol» UK AQ basqarma tóraǵasy Darhan Imanashev, oblystyq máslıhat depýtattary, zııaly qaýym ókilderi, el aǵalarynyń qatysýymen «Batys Eýropa – Batys Qytaı» halyqaralyq avtodáliziniń Qyzylorda – Aqtóbe baǵytyn tórt jolaqty etip keńeıtý jobasynyń birinshi kezeńiniń bastalý rásimi ótti.
Aımaq basshysy jınalǵan jurtshylyqty respýblıkalyq mańyzy bar avtomobıl joly qurylysynyń bastalýymen quttyqtap, jol-kólik ınfraqurylymyn damytýda atqarylǵan jumystarǵa toqtaldy.
— Bıyl — elimiz, óńirimiz úshin tarıhı mańyzdy jyl. Memleket basshymyz Qasym-Jomart Kemeluly qalamyzda ótken Ulttyq quryltaıdyń qorytyndy besinshi otyrysynda «Sońǵy jyldary Qyzylorda oblysy zaman talabyna saı ósip-órkendep jatyr» dep, Syr óńirinde atqarylǵan jumystarǵa oń baǵasyn berdi. Oblysymyzdyń áleýmettik-ekonomıkalyq damýyna, turǵyndarymyzdyń ál-aýqatyn arttyrýǵa baǵyttalǵan birqatar jańa iri jobanyń júzege asyrylatynyn, onyń ishinde «Beıneý — Sekseýil» baǵytyndaǵy jol qurylysy bıyl qolǵa alynatynyn, «Batys Eýropa — Batys Qytaı» halyqaralyq avtodáliziniń Qyzylorda — Aqtóbe baǵytyn tórt jolaqty etip keńeıtý jobasy bastalatynyn aıtty.
Prezıdentimiz «Jer kólemi jóninen álemde toǵyzynshy oryn alatyn elimizdiń, jalpy, kólik-tranzıt salasynda zor múmkindikteri bar. Bul — aıryqsha nazar aýdarýdy talap etetin strategııalyq baǵyt» degen bolatyn.
Osy maqsatta óńirimizde belsendi jumystar atqarylyp jatyr. Memleket basshymyzdyń, Úkimettiń erekshe qoldaýymen 2022-2025 jyldary aımaǵymyzdaǵy 1 600 shaqyrym avtomobıl joly men kóshelerdi, 30 kópir ótkelin salýǵa, kúrdeli jóndeýden ótkizýge 150 mlrd teńgege jýyq qarjy bólindi.
Nátıjesinde jaqsy jaǵdaıdaǵy joldardyń úlesi 95 paıyzǵa jetti. Bıyl da jol ınfraqurylymyn damytýǵa baǵyttalǵan 56 jobaǵa bıýdjetten 37 mlrd 845 mln teńge qaralǵan. Bul qarjyǵa 136 shaqyrym jol men kópir ótkelderi jóndeýden ótedi.
Búgin Ózderińizben birge aımaǵymyz úshin mańyzy zor jobalardyń biri Qyzylorda — Aqtóbe baǵytyndaǵy joldy tórt jolaqtyǵa keńeıtýdiń birinshi kezeńin bastaımyz.
Qurylysy bastalǵaly turǵan avtojol óńirdiń órkendeýine, halyq ıgiligine qyzmet etetin mańyzdy kólik dálizine aınalsyn! Júrgizýshiler men jolaýshylarǵa árdaıym aq jol, sát sapar tileımiz, — dedi Nurlybek Mashbekuly.
Rásimde Darhan Serikuly, Qyzylorda oblysynyń Qurmetti azamaty, Qazaqstannyń Eńbek Eri Abzal Jumashuly izgi tilegin jetkizdi.
Aıta keteıik, Memleket basshysy 2023 jylǵy 10 qazanda Syr óńirine jumys saparymen kelgende Qyzylorda qalasynan Aqtóbege deıingi avtomobıl jolyn tórt jolaqtyǵa aýystyrýdyń jobalaý jumystaryn jedel bastaýdy tapsyrǵan bolatyn.
Osy jumysty qysqa merzimde aıaqtaý úshin demeýshiler esebinen 350 mln. teńgege tehnıka-ekonomıkalyq negizdeme ázirlendi, 487 shaqyrym jolǵa memlekettik saraptamanyń oń qorytyndysy alyndy.
Jalpy joba 2 kezeńnen turady. Birinshi kezeńi — 26 shaqyrymdyq Qyzylorda qalasynyń aınalma jolyn salý. Ekinshi kezeńi — Qyzylorda qalasynan bastalyp Syrdarııa, Jalaǵash, Qarmaqshy aýdandarynyń syrtymen aınalyp ótip, «Batys Eýropa — Batys Qytaı» halyqaralyq kólik dálizine qosylatyn 462 shaqyrym jol.
Avtodáliz boıyna jańadan 11 kópir, 13 jol ótkeli, 62 úı janýarlaryna arnalǵan ótkel men 399 sý ótkizgish qubyr salynady. Jolaýshylar men júrgizýshilerge arnalǵan zamanaýı servıstik qyzmet kórsetetin pýnktter boı kóterip, shaǵyn jáne orta bıznestiń damýyna múmkindik týady.
Avtojoldyń ІІ sanattan І sanatqa aýysýy kólik qatynasyn edáýir jeńildetip, júk tasymalynyń tıimdiligin arttyrady.
