Qyzylorda-Aqtóbe aralyǵynda jyldamdyq ólsheý qurylǵylary iske qosyldy

QYZYLORDA. KAZINFORM — Qyzylorda oblystyq polıtsııa departamentiniń jol qaýipsizdigin qamtamasyz etý baǵytyndaǵy jumysy nátıjesinde bıyl qańtar aıynda jol-kólik oqıǵalary 13,7%, qaza bolǵandar 25%, jaraqat alǵandar sany 20,6%-ǵa tómendedi.

Búgingi kúni óńirde jol ústindegi quqyqbuzýshylyqty avtomatty túrde anyqtaıtyn 124 qurylǵy shtattyq rejımde jumys istep tur. 

— Olardyń kómegimen esepti kezeńde 7 myńǵa jýyq quqyqbuzýshylyq anyqtaldy. Jaıaý júrginshilerdiń qaýipsizdigin qamtamasyz etý maqsatynda qosymsha 10 «Sunqar» avtomattandyrylǵan qurylǵysy qaladaǵy negizgi kósheler men qıylystarǵa qoıyldy. Qyzylorda qalasynan Aqtóbe oblysynyń shekarasyna deıingi 6 statsıonarlyq baqylaý arkasynda ortasha jyldamdyqty ólsheý qurylǵylary iske qosyldy, — dedi departamenttiń ákimshilik polıtsııa basqarmasy bastyǵynyń mindetin atqarýshy, polıtsııa podpolkovnıgi Nurken Baqtııarov.

Tártip saqshylary respýblıkalyq mańyzy bar avtomobıl joldarynda baqylaýdy kúsheıtti. 32 eldi mekenniń ýchaskelik polıtsııa ınspektorlary qyzmettik avtokólikterimen kún saıyn belgili bir ýaqytta qosymsha kúsh retinde kezekshilikke shyǵady. 

— Jol boıynda júrgizýshilerge eskertý úshin qaýipti aımaqtar men úı janýarlary shyǵýy múmkin 51 aýmaq týraly málimetti «ıAndeks» navıgatsııalyq qosymshasyna engizýdi usynyp otyrmyz. Al óreskel quqyqbuzýshylyqtardy anyqtaý maqsatynda ushqyshsyz ushý apparattary qoldanysqa berildi. Árbir qylmys pen jol-kólik oqıǵalary taldanyp, jeke quram men kúsh-quraldary jol apaty jıi bolatyn aýmaqtarǵa shoǵyrlandy, — dedi departament ókili.

Aıta keteıik, ótken jyly Qyzylorda oblysynda jol-kólik oqıǵalarynyń sany 47,9% (978-den 1446-ǵa) óskeni anyqtaldy.