Qyzylorda-Aqtaý baǵytyndaǵy áýe reısi qaıtadan jandanady

QYZYLORDA. KAZINFORM — Qyzylorda oblysynda Astana, Almaty, Shymkent, Jezqazǵan, Túrkistan, Saryaǵash, Aqtóbe sııaqty qalalarǵa oblysaralyq 18 avtobýs baǵyty uıymdastyrylǵan.

Oblystyq jolaýshylar kóligi jáne avtomobıl joldary basqarmasynyń málimetinshe, odan bólek Ózbekstan astanasy Tashkent qalasyna da kólik qatynap tur. Al jýyrda Qyzylorda men Qorǵas halyqaralyq shekara mańy yntymaqtastyǵy ortalyǵynyń arasyn jalǵaıtyn turaqty baǵyt ashyldy.

— Qorqyt ata áýejaıy arqyly aptasyna 29 reıs oryndalyp tur. Onyń ishinde Astana qalasyna – 17, Almaty qalasyna 12 reıs ashylǵan. Bul reısterdi «AirAstana», «Fly Arystan» jáne «Qazaq Air» áýe kompanııalary atqaryp keledi. «Fly Arystan» áýe kompanııasy bıyl jazda Túrkııanyń Antalıa qalasyna charterlik reıs oryndady, — delingen habarlamada.

Ótken jyly Qyzylorda-Aqtaý baǵytyna áýe reısi ashylyp, jolaýshylardyń azdyǵyna baılanysty toqtatylǵan edi. Oblystyq basqarma keler jyldan bastap áleýmettik mańyzy bar reısterdiń tizbesine atalǵan baǵyt qaıtadan engiziletinin málimdedi. Kelisimge sáıkes, kelesi jyldyń sáýir aıynan bastap qyzylordalyqtar «SCAT» áýe kompanııasynyń ushaqtarymen Aqtaý qalasyna jol júre alady.

Buǵan deıin biz bas shahary men barlyq aýdan ortalyqtary bir temirjoldyń boıynda ornalasqan Qyzylorda oblysynda temirjol ótkelindegi keptelis máselesi qalaı sheshilip jatqanyn jazdyq.