Qyzylorda ákimdiginiń ǵımaratyn jóndeýge bıýdjetten bir tıyn bólingen joq
QYZYLORDA. KAZINFORM – Qyzylorda oblysynyń ákimdigi ákimdik ǵımaratyn aǵymdaǵy jóndeýden ótkizý úshin bıýdjetten eshqandaı qarjy qaralmaǵanyn málimdedi.
- Kezinde sapasyz salynýyna baılanysty qys mezgilinde ǵımarat ishi salqyndap, aýa raıynyń qolaısyz kezeńinde syrtqy taqtaıshalary túse bastaǵan. Ǵımaratqa demeýshiler esebinen aǵymdaǵy jóndeý jumystary júrgizilip jatyr. Bıýdjetten eshqandaı qarjy qaralmaǵanyn atap ótemiz. Osyǵan baılanysty azamattardyń qaýipsizdigin saqtaý maqsatynda jumys aıaqtalǵanǵa deıin ýaqytsha qorshaý qoıylǵanyn habarlaımyz, - delingen ákimdiktiń málimdemesinde.
Qyzylordada buǵan deıin ákimdik ǵımaraty ornalasqan Sultan Beıbarys kóshesi keńeıip, jaıaý júrginshiler joly jańardy. Kóshe jańa ǵımarattarmen aıshyqtalyp, jaryqtandyryldy.
- Sonymen qatar oblys ákimdigi ǵımaratynyń qorshaýy alynyp, bul mań qala turǵyndary men qonaqtary úshin serýendeıtin kórikti orynǵa aınaldy, - delingen habarlamada.
Buǵan deıin biz Qyzylorda oblysyna ınvestıtsııa tartý kórsetkishi artyp kele jatqanyn jazǵanbyz.