Qyzylorda ákimdigi buryn jóndelgen kóshege 1,2 mlrd teńgege konkýrs jarııalaǵan
QYZYLORDA. KAZINFORM – Qyzylorda qalasynyń prokýratýrasy bıýdjet qarajatynyń maqsatty jumsalýyna júrgizilgen taldaý nátıjesinde 2,8 mlrd teńgege quqyq buzýshylyq anyqtady.
— Qala ákimdigi 1,4 mlrd teńgege qala kóshelerin jóndeýge jarııalanǵan konkýrsta buryn jóndeý jumystary júrgizilgen kósheni engizgen. Osy tektes, jumystar orny men kólemi naqty kórsetilmegen jobalaý-smetalyq qujattama negizinde kóshelerdi kúrdeli jóndeýge 1,2 mlrd teńgege, sondaı-aq qala kóshelerin jyl kóleminde sanıtarlyq tazalaý jumystary shartqa sáıkes júzege asyrylyp jatqanyna qaramastan, qosymsha tazalaý jumystary úshin 223,2 mln teńgege negizsiz memlekettik satyp alý konkýrstary jarııalanǵan, - delingen habarlamada.
Engizilgen qadaǵalaý aktisiniń qaralý nátıjesimen 2,8 mlrd teńgege 3 konkýrstyń kúshi joıylyp, bıýdjet qarajatynyń negizsiz jumsalýyna jol berilmedi.
Atalǵan baǵytta jumystar jalǵasyp jatyr.
Buǵan deıin habarlanǵandaı, Qyzylorda oblysynda 2,3 mln tekshe metrden astam sýdy zańsyz paıdalaný faktileri anyqtalǵan edi.
