Qyzylordada «Zań men tártip» qaǵıdatyn iske asyrý máselesi talqylandy
QYZYLORDA. KAZINFORM – Búgin oblys ákimi Nurlybek Nálibaev, QR Bas prokýratýrasy janyndaǵy Quqyq qorǵaý organdary akademııasynyń rektory Nurǵalym Ábdirov quqyq qorǵaý organdarynyń, basqarmalardyń, jergilikti oqý oryndarynyń basshylarymen, professorlar jáne stýdenttermen, adam jáne bala quqyqtary jónindegi ýákildermen kezdesti.
Onda «Zań men tártip» qaǵıdatyn óńirlik deńgeıde naqty iske asyrý, quqyq qorǵaý organdarynyń kásibı áleýetin arttyrý, ǵylym men praktıkanyń ózara baılanysyn kúsheıtý máseleleri talqylandy.
Nurlybek Mashbekuly elimizdiń quqyq qorǵaý, zań shyǵarý salalaryndaǵy aýqymdy reformalarǵa toqtaldy.
- Memleket basshymyz 2026 jylǵy 15 naýryzda jańa Konstıtýtsııaǵa arnalǵan respýblıkalyq referendým ótkizý jóninde Jarlyqqa qol qoıdy.Konstıtýtsııa jobasynda Uly Dalanyń myńjyldyq tarıhynyń sabaqtastyǵy saqtalyp, memlekettiń ýnıtarly sıpaty men shekarasyna, aýmaqtyq tutastyǵyna qol suǵýǵa bolmaıtyny naqtylanǵan.Bizdiń maqsatymyz ortaq, ol – Táýelsiz elimizdiń turaqtylyǵyn qamtamasyz etip, halqymyzdyń ómir súrý sapasyn arttyrý.
Al «Zań men tártip» qaǵıdatynyń Konstıtýtsııa deńgeıinde bekitilýi zań ústemdigi memleket pen qoǵam ómiriniń basty qundylyǵyna aınalatynyn bildiredi.Bul mindet, eń aldymen, quqyq qorǵaý júıesiniń kásibıligine, kadr sapasy men basqarý mádenıetine tikeleı baılanysty.
Byltyr 30 jeltoqsanda Memleket basshymyz «Quqyq buzýshylyq profılaktıkasy týraly» zańǵa qol qoıdy. Bul zań quqyqbuzýshylyqtyń aldyn alýdy jazalaý sharalarynan basym qoıyp, profılaktıkanyń biryńǵaı júıesin qalyptastyrady. Kámeletke tolmaǵandar arasyndaǵy quqyqqa qaıshy minez-qulyqtyń, turmystyq zorlyq-zombylyqtyń, áleýmettik táýekelderdiń aldyn alý boıynsha keshendi ári vedomstvoaralyq jumysty kúsheıtýge múmkindik beredi.
Prezıdentimizdiń tapsyrmasymen «Adal azamat» birtutas tárbıe baǵdarlamasy ázirlenip, barlyq bilim berý uıymyna engizildi. Búginde baǵdarlama «Zań men tártip», «Eńbek adamy», «Taza Qazaqstan» ustanymdary aıasyna júıelendi. Bul – bolashaǵyna alańdaıtyn, urpaq tárbıesin basty qundylyq sanaıtyn elimiz úshin aıryqsha mańyzǵa ıe baǵyttar, – dedi N.Nálibaev.
Jıynda Nurǵalym Ábdirov sóz sóılep, akademııa bilikti kadrlar daıarlap, quqyqtyq saýattylyqty arttyrýǵa baǵyttalǵan júıeli jumystar júrgizetinin, onyń túlekteri quqyq qorǵaý júıesiniń kásibı áleýetin nyǵaıtyp, «Adal azamat» qaǵıdatyn iske asyrýǵa belsendi úles qosatynyn aıtty. Qyzylorda oblysynyń prokýrory Rızabek Ojarov, Qorqyt ata atyndaǵy ýnıversıtetiniń rektory Naýryzbaı Baıqadamov, akademııanyń kafedra meńgerýshisi Artýr Baımahanov kún tártibindegi másele boıynsha baıandama jasady.
Sóz qorytyndysynda oblys ákimi barsha jurtshylyqty aldaǵy mańyzdy saıası kezeńde eldik múdde jolyndaǵy iske joǵary jaýapkershilikpen belsendi atsalysýǵa shaqyrdy.
Jıyn sońynda aımaq basshysy, QR Bas prokýratýrasy janyndaǵy Quqyq qorǵaý organdary akademııasynyń rektory, oblys prokýrory men oblystyq polıtsııa departamentiniń bastyǵy Qyzylorda oblysynda kámeletke tolmaǵandardyń qatysýymen jasalatyn quqyqbuzýshylyqtardyń profılaktıkasy salasyndaǵy vedomstvoaralyq ózara is-qımyl týraly kelisimge qol qoıdy.
