Eks-ákim Qyzylaǵash tasqynynan úısiz qalǵandarǵa arnalǵan baspanany menshiktep aldy — turǵyndar
TALDYQORǴAN. KAZINFORM — Jetisý oblysynda 14 jyl burynǵy sý tasqynynan keıin salynǵan úıge qatysty daý shyqty. Qyzylaǵashtyqtar burynǵy ákim zańdy belsheden basyp, kommýnaldyq baspanany menshiktep aldy dep shaǵym jazǵan.
2010 jyly bolǵan alapat apattan keıin aýylda boı kótergen úılerdiń 12-si kommýnaldyq sanatqa ótken. Sonyń biri — S. Jaısanuly kóshesindegi 6-úı. Paıdalanýǵa berilgeli eldi mekenge syrttan keletin jas mamandar turyp kelgen. Alaıda, 2017 jyly bul úıdi sheneýniktiń týysy jekeshelendirip alǵanyn aıtady halyq.
«Biz ádilettikti qalaımyz. Jaısanuly 6-daǵy úıdi aýylǵa qaıtarsyn. Jalǵan aqparat berip, sotty aldap, baspanany ózine aýdaryp alǵan. Sol úshin biz shýlaǵanbyz. Ol qujattardy qaıtalap jasap, apasynyń atyna aýdaryp alǵan», — deıdi aýyl turǵyny Sáýle Ámıtova.
2019 jyly turǵyndardyń talabymen baspana notarıaldy túrde memleket balansyna qaıtarylypty.
«Daý bolyp jatqan Qyzylaǵash aýyly Jaısan kóshesindegi 6-úıde osyǵan deıin — 2010 jyly alǵash salyq ınspektory Saıan turdy, odan keıin salyq ınspektory Qalıbekov Ashat turdy. Keıin shamamen 2015-16 jyldary, naqtysyn bilmedim, okrýg ákimi aparatynyń bas mamany Samıhov Aıdar sonda ornalasty. 2017 jyly sot sheshimi arqyly Aıdardyń apasy Samıhova Razııaǵa jekemenshikke ótti. 2019 jyly aýyl turǵyndarynyń shaǵymynan soń Samıhova notarıaldy túrde okrýg ákimi apparatynyń balansyna qaıtadan ótkizip berdi. Sot sheshimi bolǵandyqtan, ol bazada jańaǵy azamatshanyń atynda kórsetilip turdy. Qazir sot protsesi Samıhova endi sol úıdi qaıta óziniń jeke menshigine aýdarý týraly júrip jatyr», — deıdi Qyzylaǵash aýyldyq okrýginiń ákimi Nurlan Dosmaqov.
Turǵyndardyń sózin qazirgi ákim rastap otyr. Buryn kommýnaldyq sanattaǵy úıdiń qalaı ıesiz dep tanylǵanyn, qandaı jolmen jekeshelendirilgenin bilmeımin, biraq sot sheshimi bar degendi aıtty. Talasqa túsken úıdiń taǵdyry aldaǵy sot otyrysynda sheshilmek.
Al turǵyndardy alańdatyp otyrǵan — 11 úıdi jekeshelendirý máselesi. Kópbalaly ana Aqmaral Qabımýldınova 14 jyl boıy osy máseleni sheshe almaı, tabanynan tozǵanyn aıtady:
«Memleket bergen úıdi bizge kópbalaly ana retinde jekeshelendirý — meniń máselem sol bolyp tur. Úıdi alǵanymyzǵa 15 jylǵa ketti. Apatta úıdi berdi oǵan rızamyz, biraq úıdiń qujaty joq úkimettiń balansynda tur. Bizge tegin bersin. Ótinishim osy. 12 úı bar ǵoı sony kóp balalylarǵa múgedekterge berse eń bolmasa. Jumys jasap alyp jatqandarǵa da bere bersin olar munda 40 jyl jumys jasap ómir súrgen adamdar ǵoı».
«Ol úıler osy Qyzylaǵash aýyldyq okrýgy ákimi aparatynyń memlekettik mekemesi teńgeriminde. 2023 jyldan bastap atalǵan azamattarmen kelisimshart jasalǵan. Bul kisilerdiń surap otyrǵany jekeshelendirý ǵoı. Ózin-ózi basqarý týraly zańnyń 35- babyna sáıkes aýyldyq okrýg ákimderiniń ókilettikteri anyqtalǵan. Ol zańǵa sáıkes bul kisiler jergilikti ákimdik prıvatızatsııa jasaýǵa quqy bolmaı tur. Sol sebepti aýyldyq okrýg ákimdigi bizdiń bólimniń teńgerimine ótkizý úshin qujattaryn jasap jatyrmyz. Osy bólimniń balansyna teńgerip alǵannan keıin bul kisilerge jekeshelendirýge múmkindik týady», — dep túsindirdi Aqsý aýdandyq turǵyn úı-kommýnaldyq sharýashylyǵy bóliminiń basshysy Madııar Nurahmetov.
Alaıda kommýnaldyq úıler aýdandyq TÚKSh bólimine ótkennen keıin de jekeshelendirý úshin qaldyq qunymen satylady. Oǵan turǵyndardyń deni qarjylyq jaǵdaıymyz joq dep otyr.
Demek, Qyzylaǵashtaǵy 14 jylǵa sozylǵan baspana daýy áli jalǵasatyn túri bar.
Eske sala keteıik, buǵan deıin Jetisý oblysynda medbıke naýqastardyń atynan 6 mln teńgege jýyq nesıe rásimdegenin jazǵanbyz.
