«Qyzyl-Jar» fýtbol klýbynyń laýazymdy tulǵalaryna qatysty tergeý júrip jatyr
PETROPAVL. KAZINFORM — Petropavldaǵy «Qyzyl-Jar SK» fýtbol klýbynyń laýazymdy tulǵalaryna qatysty qylmystyq is qozǵalyp, qazirgi ýaqytta sotqa deıingi tergeý júrip jatyr.
Áleýmettik jelide «Qyzyl-Jar SK» fýtbol klýbynyń mıllıondaǵan qaryzy bary týraly aqparat jarııalandy. Qylmystyq iste klýbtyń eks-prezıdenti Grıgorıı Lorııanyń aty atalady. Prokýrorlardyń tekserisi kezinde bıýdjet qarajatynyń urlanǵany anyqtalǵan.
Soltústik Qazaqstan oblysynyń prokýratýrasy «Qyzyl-Jar SK» fýtbol klýbynyń laýazymdy tulǵalaryna qatysty bıýdjet qarajatyn urlaý faktisi boıynsha sotqa deıingi tergep-tekserýlerdiń biryńǵaı tiziliminde tirkelgenin, qylmystyq is boıynsha tergeý júrgizilip jatqanyn rastady.
«Tergeý aıasynda qylmystyq-protsestik zańnama normalarynyń talaptaryna sáıkes tergeý sharalarynyń jıyntyǵy júzege asyrylady. Qazaqstan Respýblıkasynyń Qylmystyq-protsestik kodeksiniń 201-baby negizinde sotqa deıingi tergeýge qatysty basqa da málimetter jarııa etýge jatpaıdy», - delingen habarlamada.
Osy jaǵdaıǵa baılanysty «FK Qyzyljar SK» JShS ókilderi de resmı jaýap berdi.
«FK Qyzyljar SK» JShS qazirgi ýaqytta SQO prokýratýrasy men ekonomıkalyq tergeý departamenti salyq mindettemeleri boıynsha bereshektiń sebepteri men mán-jaılaryn anyqtaýǵa baǵyttalǵan tergeý is-sharalaryn júrgizip jatqanyn rastaıdy.
Klýb tergeý organdaryna tolyq kómek kórsetýge daıyn jáne qazirgi jaǵdaıdy retteý úshin barlyq qajetti sharany qolǵa alyp jatyr.
«FK Qyzyljar SK» JShS basshylyǵy aldaǵy ýaqytta da óz qyzmetinde ashyqtyq pen jaýapkershilik qaǵıdattaryn qatań ustanatyn bolady», - delingen jaýapta.
Buǵan deıin SQO-da orman mekemeleri memleketke keltirilgen 53 mln teńge shyǵynnyń ornyn toltyrǵanyn jazǵan edik.