«Qyzyl-Jar» fýtbol klýbynyń eks-prezıdentine memleketaralyq izdeý jarııalandy
ASTANA. KAZINFORM — «Qyzyl-Jar» klýbynyń burynǵy prezıdenti 414 mln teńgeni jymqyrdy degen kúdikke ilinip otyr.
Qarjylyq monıtorıng agenttiginiń Soltústik Qazaqstan oblysy boıynsha departamenti «Qyzyl-Jar» klýbynyń burynǵy prezıdenti Grıgorıı Lorııaǵa memleketaralyq izdeý jarııalady.
— Lorııa Grıgorıı Otarovıch, 1954 jylǵy 18 naýryzda týǵan, Qazaqstan Respýblıkasynyń azamaty, «Qyzyl-Jar SQ» fýtbol klýby» JShS-niń burynǵy prezıdenti. Ol jalpy somasy 414 mln teńgeden astam bıýdjet qarajatyn jymqyrdy jáne salyq tóleýden jaltardy degen kúdikke ilingen, — delingen vedomstvo habarlamasynda.
Belgili bolǵandaı, 2023 jyly fýtbol klýbynyń qyzmetin qarjylandyrýǵa jergilikti bıýdjetten 1,7 mlrd teńge bólingen. Tergeý deregine saı, kúdikti bas býhgaltermen jáne ózge de tulǵalarmen aldyn ala sóz baılasyp, jalǵan qarjylyq qujattardy paıdalanǵan, qarajattyń jeke shottarǵa negizsiz aýdarylýyn uıymdastyrǵan.
— Sondaı-aq býhgalterlik jáne salyq eseptiligine kórineý jalǵan málimetterdiń engizilýin qamtamasyz etken. Atap aıtqanda, salyq deklaratsııalarynda qyzmetkerlerdiń tabysy, eńbekaqy tóleý qory jáne uıymnyń jyldyq jıyntyq tabysy tómendetilip kórsetilgen. Eger izdeýde júrgen azamattyń qaıda ekeni týraly qandaı da bir aqparat bilseńiz, Qarjylyq monıtorıng agenttigine habarlaýyńyzdy suraımyz. Baılanys telefondary: +7 (7172) 70-84-78 — kezekshi bólim. Call-ortalyq: 1458, — dep eskertti QMA baspasóz qyzmeti.
Osyǵan deıin «Qyzyljar» fýtbol klýbynyń jańa bas bapkeri taǵaıyndalǵanyn jazǵanbyz.
