«Qyzyl-Jar» FK-ǵa aıyppul salyndy

PETROPAVL. KAZINFORM – Qazaqstan fýtbol federatsııasy tergeýge kómektesýden bas tartqan «Qyzyl-Jar» fýtbol klýbyn jazalady.

Tergeý shilde aıynda Túrkistanda «Qyzyl-Jar» men «Turan» komandalary arasynda ótken oıynǵa baılanysty júrip jatyr. Bul match aldyn ala kelisip qoıylǵan oıyn bolýy múmkin degen kúdik bar. 

Qazaqstan fýtbol federatsııasynyń Baqylaý, tártiptik jáne etıkalyq komıtetiniń otyrysy ótip, «Turan» klýbymen ótken matchqa baılanysty qyzmettik tergeý isine kómektesýden bas tartyp, kedergi keltirgeni úshin «Qyzyl-Jar» fýtbol klýbyna jaza qoldanyldy. ıAǵnı, klýbqa 100 AEK, ıaǵnı 393 200 teńge kóleminde aıyppul salyndy. Bul somany 2025 jyldyń 7 qarashasyna deıin tóleý qajet.

Sondaı-aq klýb QFF-nyń Qaýipsizdik jáne ıntegrıtı qyzmetine oıynshylardan, menedjerden, bapkerlik shtabtan jáne matchqa qatysy bar ózge tulǵalardan suraq-jaýap alýǵa kómektesýge mindetti.

Al «Qyzyl-Jar» fýtbol klýby QFF sheshimin oryndamaǵan jaǵdaıda qatań shara qoldanylady.

Onyń ishinde upaılary alynyp, klýb tómengi dıvızıonǵa túsiriledi. Oıynshylar men resmı tulǵalarǵa fýtbol salasynda jumys isteýge tyıym salynady. 

Buǵan deıin kásipqoı fýtbol klýbtarda 100-den asa zań buzýshylyq anyqtalǵanyn jazǵan edik.