Qyzyl teńizde kemelerge shabýyl jasap júrgen hýsıtter kimder?

ASTANA. KAZINFORM - 2000 jyldardyń basynan beri sheıitter qozǵalysy basym bóligi súnnıtterden turatyn Iemen úkimetine qarsy kúresip keledi. Kóterilisshiler jaqynda Qyzyl teńizdegi birqatar kemelerge shabýyl jasap, álemdik saýdany buzdy, dep jazady Euronews. 

Sońǵy aptalarda Qyzyl teńizde saýda kemelerine shabýyl jasap júrgen ıemendik hýsıt kóterilisshileri Taıaý Shyǵysta aımaqtyq qaqtyǵysqa ulasyp ketý qaýpi bar shıelenistiń ortasynda qaldy.

Hýsıtter — ózderin Iemendegi sheıit musylman azshylyǵy — zeıdıttermen teńestiretin qarýly saıası jáne dinı top.

Bul top HAMAS pen Lıvannyń «Hezbollah» qozǵalysymen qatar Izraıl, AQSh jáne Batysqa qarsylyq tanytyp júr.

Bul topty 1990-shy jyldary Hýseın ál-Hýsı qurǵan, biraq álem onyń bar ekenin 2000-shy jyldardyń basynda, Iemenniń uzaq ýaqyt boıy avtorıtarlyq prezıdenti bolǵan Álı Abdalla Salehke qarsy soǵysqan kezinde ǵana bildi.

2011 jyly «arab kóktemi» kezinde Saleh bılikti orynbasary Abd-Rabb Mansur Hadıge tapsyrdy.

2014 jyly Hadı bıligi kezinde Iran qoldaıtyn hýsıt kóterilisshileri Iemendegi soltústik qorǵanynan shyǵyp, el astanasy Sanany basyp aldy.

2015 jyly eldiń bir bóligin basyp alǵan top Hadıdi shetelge qashýǵa májbúr etti.

Saýd Arabııasy hýsı úkimetiniń ornaı ma dep qaýiptenip, sol jyly Iemenniń halyqaralyq moıyndalǵan úkimetin bılikke qaıtarý áreketine aralasty.

Biraq janjal aqyry Saýd Arabııasy men Iran arasyndaǵy proksı soǵysymen aıaqtaldy.

Iemendegi soǵys birneshe jylǵa sozylyp, álemdegi eń kedeı arab memleketin oırandap, beıbit turǵyndar men sodyrlardy qosqanda 150 myń adamnyń ómirin qıdy jáne gýmanıtarlyq apatqa ushyratty.

Soǵys bir jyldan astam ýaqyt buryn atysty toqtatýmen aıaqtaldy, biraq beıbitshiliktiń aýyly áli alys.

Hýsıtterdiń qazirgi kóshbasshysy — toptyń negizin qalaýshynyń aǵasy Abdýl-Malık ál-Hýsı.

Hýsıtter buǵan deıin de Qyzyl teńizdegi kemelerge ara-tura shabýyl jasap júrdi.

17 qazanda Izraıldiń Gazadaǵy aýrýhanaǵa jasaǵan soqqysynan kóp beıbit turǵyn qaza taýyp, jaraqat alǵan soń top shabýylyn kúsheıtti.

Hýsıtter Gazada atys toqtatamaıynsha bul áreketininen bas tartpaıtynyn málimdedi.

Kóterilisshiler Izraılmen baılanysy bar kemelerdi nysanaǵa alǵanyn aıtty.