Qyzyl teńizde basyp alynǵan kemede bes eldiń azamattary bar

Qyzyl teńizde ıemendik «Ansar Allah» búlikshi-hýsıtter qozǵalysy Galaxy Leader kemesin basyp aldy, onyń operatory – japondyq Nippon Yusen (NYK Line) kompanııasy. Kazinform bul týraly Kyodo agenttigine silteme jasap habarlaıdy. 

Bortta Bolgarııa, Meksıka, Rýmynııa, Ýkraına men Fılıpınniń 25 ekıpaj múshesi bolǵan. Komandada Izraıl men Japonııa azamattary joq.

Keme ulybrıtanııalyq kompanııaǵa tıesili.

Buǵan deıin «Ansar Allah» ókili ıAhıa Sarıa málimdeme jasap, qozǵalys Qyzyl teńizde ızraıldik kemeni basyp alyp, ony Iemen jaǵalaýyna aparǵanyn aıtty.

Ekıpaj tutqynǵa alyndy. Marine Traffic qyzmetiniń deregi boıynsha, keme Bagam araldary dostastyǵy týyn ilip júzip bara jatqan.

Ol sońǵy ret 18 qarasha 13:04-te qaıda ekeni týraly aqparat berdi.

Sol sátte keme Qyzyl teńizdiń ortalyq bóliginde bolatyn. Qazir onyń transponderi óshirilgen.

Izraıl qorǵanys áskeri Túrkııadan Úndistanǵa bar jatqan Galaxy Leader kemesiniń evreı memleketine qatysy joq ekenin jáne ekıpaj músheleri qatarynda Izraıl azamattary bolmaǵanyn málimdedi.

Izraıl premer-mınıstri Bınıamın Netanıahý keńsesiniń málimdemesine sensek, keme brıtandyq kompanııaǵa tıesili, japon kompanııasy basqarady.

Bortynda 25 ekıpaj múshesi bolǵan, olardyń arasynda Izraıl azamattary joq.

Keńse «kemeni basyp alǵan – Iran» dep aıyptap otyr.

Jeksenbi kúni Sarıa hýsıtterdiń qoly jetetin aýmaqqa ilikken ızraıldik kemelerge shabýyl jasaımyz dep ses kórsetti.

Ol barlyq eldi ekıpaj quramyndaǵy azamattaryn evakýatsııalaýǵa jáne Izraıl keme qatynasy kompanııalarynyń qyzmetinen bas tartýǵa shaqyrdy.

Sonymen qatar qozǵalys ókili Qyzyl teńizdegi mundaı kemelerden aýlaq bolýdy usyndy.