«Qyzyl refleks»: nárestelerdiń kóz aýrýyn erte anyqtaıtyn skrınıng túri engiziledi
ASTANA. KAZINFORM – 2026–2030 jyldarǵa arnalǵan «Qazaqstan balalary» tujyrymdamasyn iske asyrý aıasynda jańa skrınıng túri engiziledi. Bul týraly QR Densaýlyq saqtaý mınıstrligi Kazinform agenttiginiń resmı saýalyna bergen jaýabynda málim etti.
– 2027 jyldan bastap jańa týǵan náresteniń týabitti kóz aýrýyn erte anyqtaýǵa arnalǵan «Qyzyl refleks» neonataldyq skrınıngi engiziledi. Onyń kómegimen týa bitken katarakta, glaýkoma, retınoblastoma, shyny tárizdi deneniń patologııasy jáne kórý aǵzasynyń basqa da týa bitken aýrýlaryn náreste ómiriniń alǵashqy kezeńinde erte anyqtaý kózdelgen, - delingen habarlamada.
Vedomstvo málimetinshe, aýrýlardy erte anyqtaý emdeýdi der kezinde bastaýǵa, aýyr asqynýlardyń aldyn alýǵa, sondaı-aq balalardyń kórý qabiletiniń buzylýy men múgedektik qaýpin azaıtýǵa múmkindik beredi.
– Sonymen qatar oftalmologııalyq kómek kórsetý standarty jańartyldy. Patsıenttiń marshrýty men oftalmologııalyq kómek kórsetý algorıtmi qaıta qaralyp, «Shala týǵan nárestelerdiń belsendi retınopatııasy» dıagnozyn qoıý jáne emdeý jónindegi klınıkalyq hattama bekitildi, - dep málimdedi mınıstrlik.
Budan bólek, elimizde shala týǵan nárestelerdiń retınopatııasy bar balalarǵa oftalmologııalyq kómek kórsetýdi uıymdastyrýǵa arnalǵan 2025–2027 jyldarǵa arnalǵan jol kartasy iske asyrylyp jatyr. Qujat aıasynda aýrýdy erte anyqtaý men emdeýdi jetildirý, medıtsınalyq uıymdardyń materıaldyq-tehnıkalyq bazasyn nyǵaıtý jáne mamandardyń biliktiligin arttyrý kózdelgen.
Eske salaıyq, buǵan deıin oftalmolog 1-2 jasar balalar arasynda kózdiń qylılanýy kóbeıip bara jatqanyn aıtqan edi.
