Qyzyl kitapqa engen 28 qusty shetelge áketpek bolǵan qylmystyq top ustaldy
Atyraý áýejaıynda 28 ıtelgi qusyn shetelge áketpek bolǵan qylmystyq top ustaldy. QazAqparat bul týraly Ulttyq qaýipsizdik komıtetine silteme jasap habarlaıdy.
Ulttyq qaýipsizdik komıteti arnaıy operatsııany 17 qyrkúıekte ótkizgen. Qazaqstannyń Qyzyl kitabyna engen 28 ıtelgi qusyn kontrabandalyq jolmen shetelge shyǵarmaq bolǵan sheteldikter men QR azamattary Atyraý qalasynyń áýejaıynda ustaldy.
Olar qustardy Taıaý Shyǵys elderiniń birine jetkizýdi josparlaǵan.
«Uıymdastyrýshylardyń biriniń turǵylyqty jerin tintý barysynda ıtelgini kútip-ustaýǵa arnalǵan arnaıy jabdyqtalǵan bólme, olardy uıyqtatýǵa arnalǵan medıtsınalyq preparattar tabyldy.
QR Qylmystyq kodeksiniń 339-babynyń 3-bóligi (Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) boıynsha sotqa deıingi tergep-tekserý júrgizilýde. Keltirilgen zalaldyń somasy 200 mln teńgeden astam.
Qylmystyq-protsestik kodekstiń 201-baby 1-bóligine sáıkes ózge aqparattar jarııa etýge jatpaıdy», - delingen UQK baspasóz qyzmetiniń aqparatynda.
