Qyzyl kitap aǵashtary joq: Kókjaılaýda Almaty SuperSki kýrortynyń qurylysy bastaldy
ASTANA. KAZINFORM – Kókjaılaýda Almaty SuperSki jobasy aıasynda qurylys-montaj jumystary bastaldy. Bolashaq taý-shańǵy kýrorty aýmaǵynda Qazaqstannyń Qyzyl kitabyna engen aǵashtar joq. Al qalǵan jasyl jelekterdi barynsha saqtap qalý nemese basqa jerge kóshirý josparlanyp otyr.
Qazir atalǵan aýmaq daıyndyq kezeńinde: oǵan tehnıkalyq jáne kireberis jol salynyp jatyr. Bul jol qurylys tehnıkasynyń aýmaqqa kirýine jáne jobanyń kelesi kezeńderin bastaýǵa múmkindik beredi. Jumystar jobalyq qujattamaǵa jáne tabıǵatty qorǵaý talaptaryna sáıkes júrgizilip jatyr. Avtorlyq qadaǵalaýdy Qazaq qurylys jáne sáýlet ǵylymı-zertteý ınstıtýty júrgizbek.
Sonymen birge, Kókjaılaýda arheologııalyq zertteýler bastaldy. Aýmaqta arheologııalyq mura nysandary bolǵandyqtan, bul jumysqa Arheologııa ınstıtýtynyń mamandary tartyldy. Aldaǵy kúnderi olar qazba jumystaryn júrgizip, tarıhı eskertkishterdi zertteýge kirisedi.
Árbir arheologııalyq nysannyń aldaǵy taǵdyry jeke qaralady: qajet bolǵan jaǵdaıda qutqarý qazba jumystary júrgiziledi, keıbiri óz ornynda saqtalady, mýzeı qoryna ótkiziledi nemese Kókjaılaý aýmaǵynda mýzeı ekspozıtsııasyn uıymdastyrý múmkindigi qarastyrylady.
Sondaı-aq mamandar keńeıtilgen ınjenerlik-geologııalyq zertteýler júrgizip jatyr.
Qurylys aımaǵyna túsetin aǵashtardy barynsha saqtap qalý jáne qoldanystaǵy talaptarǵa saı basqa jerge kóshirý kózdelgen. Sonymen birge, bolashaq kýrort aýmaǵynda Qazaqstannyń Qyzyl kitabyna engen aǵash túrleri anyqtalmaǵany atalyp ótti.
11 zamanaýı aspaly joldyń qurylysyn osy aıda bastaý josparlanyp otyr. Bul jumystarǵa Frantsııanyń POMA kompanııasy tartylǵan. Qazir kompanııa qurylys alańyn daıyndaý jáne tehnıkany jumyldyrý jumystaryn júrgizip jatyr.
Budan bólek, Almaty qalasynyń ákimdigi Kókjaılaýdaǵy qosalqy elektr stantsııasyn qalpyna keltirý, Kazachka ózeni boıymen kýrort shekarasyna deıin kireberis jol salý jáne jasyl jelekterdi kóshirý jumystaryn bastady. Munyń barlyǵy jobaǵa qajetti ınjenerlik jáne kólik ınfraqurylymyn qalyptastyrý úshin júrgizilip jatyr.
Aıta keteıik, Almaty mańynda salynatyn Almaty Superski taý kýrorty jylyna myńdaǵan týrısti qabyldaıtyn iri týrıstik ortalyqqa aınalmaq. Joba aıasynda 60 shaqyrym shańǵy trassasy men 11 zamanaýı aspaly jol salynady.
