Qyzyl kirpishten salynǵan úıler nege boıalyp jatyr — Qyzylorda ákimdigi jaýap berdi

QYZYLORDA. KAZINFORM — Qyzylorda qalasyndaǵy qyzyl kirpishten salynǵan úılerdiń boıalýyna turǵyndar qarsy. Bul týraly áleýmettik jelide shaǵym kóbeıip tur.

Sonyń biri Instagram áleýmettik jelisiniń «Krıtıka Kyzylorda» paraqshasynda jarııalandy. 

— Qyzyl kirpishten salynǵan, onsyz da ádemi bolyp turǵan sol jaǵalaýdaǵy 48-úıdi aq túspen syrlap jatyr. Biz, 48-úıdiń turǵyndary buǵan qarsymyz. «Stadıonnyń qasyndaǵy ýılerdi osylaı ártúrli túste boıaımyz» deıdi. Nege boıamaı turyp ruqsat suramaıdy nemese eskertý jasamaıdy? — delingen jazbada.

Shaǵym ıesin qoldap pikir qaldyrǵandar óte kóp. Onyń biri qyzyl kirpishti boıaý qısynǵa kelmeıtinin, bul bıýdjet qarjysyn jelge shashý ekenin aıtsa, taǵy bir tarap onyń ornyna syrty kóriksiz kúıge túsken ózge úılerdi syrlaǵandy durys sanaıdy. 

Qyzylorda qalasynyń ákimdigi turǵyndar narazylyǵyna baılanysty túsinikteme berdi. 

— Sáýletshiler oblys ortalyǵyndaǵy ǵımarattardyń qasbetin birkelkilendirý, sondaı-aq kóshelerdiń sáýletin biryńǵaı úlgidegi tártipke keltirý baǵytynda tıisti jumys atqaryp jatyr. Áleýmettik, ákimshilik, qoǵamdyq nysandardyń birqatary túngi jaryqpen qamtyldy. Munyń barlyǵy qalanyń sáýlettik kelbetine jańa sán ári ádemi tús beredi. Qasbetti qaıta jańǵyrtý barysynda qoldanylyp jatqan materıaldardyń barlyǵy joǵary sapaly jáne óńirdiń tabıǵı ereksheligine tótep bere alady, — delingen ákimdiktiń jaýabynda.

Buǵan deıin qaladaǵy kópqabatty úılerdiń qasbetin panelmen qaptaý úshin oblystyq bıýdjetten 1,4 mlrd teńge bólingenin jazǵanbyz.