Qyzyl balyq, ýyldyryq, tort: SQO-daǵy áleýmettik ortalyqtarda birqatar zańbuzýshylyq anyqtaldy
PETROPAVL. KAZINFORM - Soltústik Qazaqstan oblysynda bıyl áleýmettik qorǵaý salasyndaǵy memlekettik baqylaý aıasynda 18 nysanda profılaktıkalyq baqylaý júrgizildi.
SQO halyqty áleýmettik qorǵaý salasyndaǵy retteý jáne baqylaý departamentiniń málimetinshe, baqylaý Qazaqstan Respýblıkasynyń Áleýmettik kodeksi talaptarynyń saqtalýyn qamtamasyz etý maqsatynda júrgizilgen. Sonymen qatar azamattardyń ótinishteri men prokýratýranyń talaptary negizinde múgedektigi bar adamdar úshin nysandardyń qoljetimdiligine qatysty úsh jospardan tys tekserý uıymdastyryldy.
Tekserý qorytyndysy boıynsha zań buzýdyń 33 deregi anyqtalyp, olardy joıý týraly 17 nusqama berilgen.
Áleýmettik qyzmet kórsetetin uıymdardy baqylaý barysynda anyqtalǵan negizgi kemshilikterdiń biri - qyzmet alýshylarǵa kórsetiletin arnaýly áleýmettik qyzmetterdiń jeke josparlarda tolyq qamtylmaýy.
- Keıbir qyzmet alýshylar úshin ońaltýdyń jeke baǵdarlamasynda kózdelgen is-sharalar jeke josparlarǵa tolyq engizilmegen. Bul olardyń qajetti áleýmettik jáne ońaltý qyzmetterin tolyq kólemde alýyna keri áser etýi múmkin, - deıdi SQO halyqty áleýmettik qorǵaý salasyndaǵy retteý jáne baqylaý departamentiniń basshysy Gúlbaqyt Manabaeva.
Baqylaý barysynda medıtsınalyq-áleýmettik mekemelerde, ońaltý ortalyqtarynda, múgedek balalarǵa arnalǵan oqý oryndarynda, aýmaqtyq áleýmettik qyzmet kórsetý ortalyqtarynda, kúndizgi bolý bólimshelerinde, áleýmettik beıimdeý ortalyqtarynda qyzmet alýshylardyń tamaqtanýyna da nazar aýdaryldy. Keıbir uıymdardyń kúndelikti mázirinde belgilengen tamaqtaný normalaryna sáıkes azyq-túlik ónimderiniń jekelegen túrleri bolmaǵan nemese tolyq kólemde usynylmaǵan.
- Mereke jáne demalys kúnderi belgilengen táýliktik aqshalaı shyǵystardy 10% ulǵaıtý múmkindigi tolyq paıdalanylmaǵan jaǵdaılar tirkeldi. Saldarynan mázirge qosymsha qyzyl balyq, ýyldyryq (qara jáne qyzyl), shujyqtardyń dámdi sorttary, shokoladty kámpıtter, torttar men tátti bálishter engizilmegen.
Tekserý nátıjeleri boıynsha anyqtalǵan zań buzýshylyqtardy joıý týraly nusqamalar berildi. Qazirgi tańda berilgen nusqamalardyń oryndalýy baqylaýda. Berilgen uıǵarymdar óz ýaqytynda, sapaly oryndalyp jatyr, - deıdi departament basshysy.
Buǵan deıin múgedektigi bar azamattardyń eńbegi qalaı qorǵalatynyn jazǵan edik.
