«Qyzyqty onomastıka» jańa mobıldi qosymshasy qazaqsha esimderdiń maǵynasyn túsindiredi

ASTANA. KAZINFORM — Astanalyq IT mamandar qazaq tiliniń qoldanys aıasyn keńeıtip, tegin tsıfrlyq ónimder jasaýda.

«Qyzyqty onomastıka» jańa mobıldi qosymshasy adam esiminiń, geografııalyq nysandardyń, janýarlar men qustardyń maǵynasy men shyǵý tegin bilýge ​​múmkindik beredi.

EUÝ IT mamandary qazaq tilinde «Qyzyqty onomastıka» mobıldi qosymshasyn ázirledi. Jańa tsıfrlyq ónim 800-den astam jeke ataýdy biriktiredi. Olar 100-den astam semantıkalyq belgiler boıynsha toptastyrylǵan jáne bul baǵdarlamanyń basty artyqshylyǵyna aınaldy. Mobıldi qosymshany paıdalanýshylarǵa sábıine esim tańdaýǵa nemese óz esiminiń maǵynasyn bilý múmkindigi de usynylǵan.

«Prezıdent óz sózinde memlekettik tilde tsıfrlyq ónimderdi arttyrýdyń mańyzdylyǵyn atap ótti. Biz kópshilik úshin yńǵaıly «Qyzyqty onomastıka» mobıldi qosymshasyn iske qostyq. Barlyq ataýlar semantıkalyq qasıetteri boıynsha toptastyrylǵan, bul - bizdiń jobamyzdyń biregeıligi. 1,5 jyl boıy tabandy eńbek ettik, kóptegen jumystar men materıaldar zertteldi. Bizdiń qosymshamyz áıel men er adamdar esimderiniń shyǵý tilin, etımologııasyn bilýge múmkindik beredi. Eger sizdiń esimińiz birneshe sózden tursa, olardyń árqaısysynyń jeke maǵynasyn taba alasyz. Sondaı-aq tsıfrlyq platformada alfavıt boıynsha suryptaý bar, paıdalanýshylarǵa yńǵaıly bolý úshin izdeý tarıhy saqtalady jáne siz tańdaǵan esimderdi bólek saqtaýǵa bolady», - dep atap ótti joba jetekshisi, L.N. Gýmılev atyndaǵy EUÝ Tsıfrlyq damý jáne qashyqtyqtan oqytý departamentiniń dırektory Gúlmıra Bekmanova.

Tsıfrlyq platformada yńǵaıly navıgatsııa jáne jyldam izdeý júıesi bar. Mobıldi qosymsha qazir Android platformasynda qoljetimdi.