Qyzy ákesiniń nemeresine muraǵa qaldyrǵan úıin sot arqyly tartyp almaq boldy

ASTANA. KAZINFORM - Almatyda qyzy ákesiniń nemeresiniń paıdasyna jasaǵan ósıetin sot tártibimen daýlaǵan. Bul týraly Joǵarǵy sot habarlady.

Talap qoıýshy óz talaptaryn negizdeı otyryp, mura qaldyrýshy tiri kezinde spırttik ishimdikterdi shamadan tys paıdalanǵanyn, narkologııalyq dıspanserde esepte turǵanyn, alkogolızmnen em qabyldaǵanyn jáne sonyń saldarynan óz áreketteriniń mánin túsinbegenin jáne óz áreketin basqara almaǵanyn kórsetken.

Talap qoıýshynyń pikirinshe, ózi daýlap otyrǵan ósıet onyń birinshi kezektegi murager retindegi quqyqtaryn buzady.

Birinshi satydaǵy sot qaıtys bolǵannan keıin júrgiziletin sottyq psıhologııalyq-psıhıatrııalyq saraptama taǵaıyndaǵan. Saraptama qorytyndysyna sáıkes, ósıet jasalǵan sátte mura qaldyrýshyda psıhıkalyq buzylystyń belgileri bolǵan, sonyń saldarynan ol óz áreketteriniń mánin uǵyna almaǵan jáne olardy basqara almaǵan.

Alaıda birinshi jáne apellıatsııalyq satydaǵy sottar bul qorytyndyny nazarǵa almady. Sebebi onyń negizine alynǵan dáleldemeler (dárigerlik keńes, ýchaskelik ınspektordyń raporty, kórshilerdiń minezdemeleri) jol berilmeıtin dáleldemeler dep tanyldy. 

Sot mura qaldyrýshy tiri kezinde psıhıatr men narkologtyń esebinde turmaǵanyn, alkogolızmnen em qabyldamaǵanyn, ákimshilik nemese qylmystyq jaýaptylyqqa tartylmaǵanyn, sondaı-aq ósıet jasalǵan kezeńde saraptama materıaldarynda kórsetilgendeı Astanada emes, Almaty qalasynda turǵanyn anyqtady.

Іsti qaraý barysynda sot psıhıkalyq densaýlyq salasyndaǵy medıtsınalyq-áleýmettik kómek kórsetý standarttarynyń buzylǵanyn anyqtady. Osyǵan baılanysty birinshi satydaǵy sot ýákiletti organǵa joldanǵan jeke uıǵarym shyǵardy.

Atalǵan uıǵarym zańdy kúshine enip, nátıjesinde psıhıatr dárigerdiń lıtsenzııasynyń qoldanylýy toqtatyldy (kúshin joıdy).

Kassatsııalyq sot tómengi satydaǵy sottardyń tujyrymdarymen kelisip, ósıettiń mazmuny azamattyq zańnama talaptaryna sáıkes keletinin kórsetti. 

Notarıýs ósıetti kýálandyrý rásimin saqtaǵan, mura qaldyrýshyǵa jasalyp otyrǵan mámileniń quqyqtyq saldary túsindirilgen. Mura qaldyrýshynyń erik bildirý faktisi ósıet jasalǵan kezde qatysqan kýániń aıǵaqtarymen rastaldy. 

Kýá mura qaldyrýshy 2014 jyldan beri onymen birge turǵan nemeresine páterin sanaly túrde qaldyrýǵa sheshim qabyldaǵanyn túsindirgen. Osylaısha, kassatsııalyq saty mura qaldyrýshy óz múlkine zańda belgilengen tártippen tıisti túrde bılik etkenin, tiri kezinde ósıetti joımaǵanyn jáne ózgertpegenin anyqtady.

Aıta keteıik, Aqtóbede kýrsant ólimine qatysty is boıynsha sotaldy tyńdaýy ótti.