Qyzǵylt qoqıqaz jáne qazaq mádenıeti: Aqmola oblysynda «Flamingo Fest» festıvali ótedi

Festıvaldiń basty taqyryby – óńirdiń biregeı tabıǵatyn mádenıetpen, ulttyq ónermen jáne salt-dástúrmen sabaqtastyrý.

Qorǵaljyn óńiri kólderi men baı bıoalýantúrliligimen tanymal. Onyń basty tabıǵı kórikti jerleriniń biri – óńirdiń ózindik vızıttik kartochkasyna aınalǵan qyzǵylt qoqıqazdar. Dál osy qoqıqaz festıvaldiń sımvoly retinde tańdalyp, tabıǵat sulýlyǵy, úılesim jáne qorshaǵan ortaǵa uqypty qaraý taqyryptaryn biriktiredi.

Festıval qonaqtary óńirdiń kórikti jerlerimen tanysa alady. Mádenı baǵdarlama aıasynda folklorlyq jáne bı ujymdarynyń óner kórsetýi, dástúrli mýzyka, gala-kontsert, etnoaýyl jáne ulttyq oıyndar uıymdastyrylady.

Aqmola oblysynyń Іshki saıasat basqarmasy málimetinshe, jeke alań halyq shyǵarmashylyǵyna arnalady. Qolóner sheberleri óz týyndylaryn kórme-jármeńkede usynsa, sýretshiler «Flamingo Art» oblystyq baıqaýyna qatysady. Sýretter men sheberlerdiń qolóner buıymdary arqyly qonaqtar óńirdiń tabıǵaty men mádenı erekshelikterin shyǵarmashylyq qyrynan tanyp-biledi.

Festıvaldiń mańyzdy bóligi – ekologııalyq baǵdarlama. Qatysýshylar úshin Qorǵaljyn memlekettik tabıǵı qoryǵynyń bıoalýantúrliligine, onyń mekendeýshilerine jáne tabıǵatty qorǵaý máselelerine arnalǵan tanymdyq is-sharalar men aktsııalar uıymdastyrylady.

Osylaısha, festıval mádenı jáne ekologııalyq baǵyttardy toǵystyryp, tabıǵı muraǵa jaýapkershilikpen qaraýǵa nazar aýdarady.

Uıymdastyrýshylardyń aıtýynsha, «Flamingo Fest» festıvaline Aqmola oblysynyń turǵyndarymen qatar, Qazaqstannyń basqa óńirlerinen kelgen týrıster men sheteldik qonaqtar da qatysady.

Festıvaldi ótkizý – tabıǵı kórikti jerler men ulttyq mádenıet, sondaı-aq zamanaýı demalys formattary úılesim tapqan týrıstik baǵyt retinde Qorǵaljyndy tanytýdyń taǵy bir múmkindigi.

Bıyl ekinshi ret ótkizilip otyrǵan «Flamingo Fest» festıvalin Aqmola oblysynyń tanymal mádenı-týrıstik brendi retinde odan ári damytý josparlanyp otyr. Uıymdastyrýshylar joba týrısterdi tartýǵa, ulttyq ónerge degen qyzyǵýshylyqty arttyrýǵa jáne Qorǵaljyn óńiriniń tabıǵı murasyn Qazaqstanda jáne shetelde keńinen tanytýǵa yqpal etedi dep kútedi.