Qyzǵaldaq pen báısheshek Tájikstannyń ulttyq gúlderi bolyp jarııalandy
ASTANA. KAZINFORM — Tájikstanda qyzǵaldaq pen báısheshek tájik halqynyń rýhanı sımvoly retinde ulttyq gúlder bolyp jarııalandy, dep habarlaıdy Kazinform agenttiginiń Dýshanbedegi menshikti tilshisi.
Tájikstan prezıdentiniń baspasóz qyzmetiniń málimetinshe, tıisti jarlyqqa Emomalı Rahmon búgin qol qoıǵan. Atalǵan sheshim eldiń tarıhı-mádenı murasyn halyqaralyq deńgeıde tanytyp, qyzǵaldaq pen báısheshekti ulttyq sımvol retinde dáripteý maqsatynda qabyldanǵan.
— Bul gúlder tájik halqynyń mádenı murasymen bite qaınasyp, Naýryz meıramy men tabıǵattyń kóktemde qaıta túleıtin shaǵymen sabaqtasqan. Báısheshek kóktemniń kelgenin bildirip, halyqtyń tarıhı-mıfologııalyq jadyn, tazalyq pen ádildiktiń saltanatyn beıneleıdi. Al qyzǵaldaq halqymyzdyń ar-namysy men qadir-qasıetin, el tabıǵatynyń sulýlyǵy men gúldenýin aıshyqtaıdy, — delingen Tájikstan prezıdentiniń baspasóz qyzmeti taratqan habarlamada.
Halyq nanymynda báısheshekti alǵash tapqan adam joly bolady dep eseptelgen. Ómirdiń jańarýyn, jastyq pen sulýlyqty beıneleıtin bul gúldi balalar taýdan terip, analary men ápke-qaryndastaryna syılaıdy.
«Qyzǵaldaq terý» («Saırı gýlı lola») merekesi ıslamǵa deıingi dáýirden beri qyzǵaldaqtar jappaı gúldeıtin kezeńde birneshe kún boıy toılanǵan. Alǵashqy kúni jastar án aıtyp, bı bılep, qyzǵaldaqtardy aǵash butaqtaryna baılap, tilek tilegen. Ekinshi kúni zırattar men qasıetti oryndarǵa barǵan.
2019 jyly Tájikstan prezıdentiniń bastamasymen festıval qaıta jandanyp, jyl saıyn ótkiziledi. Búginde festıval aıasynda gúl kompozıtsııalarynyń úzdikteri anyqtalyp, jeńimpazdarǵa aqshalaı syılyqtar tabystalady. Al festıvaldiń qorytyndysy dástúrli túrde sáýirdiń tórtinshi senbisinde ótedi.
Buǵan deıin Tájikstanda ejelgi Mehrgon egin merekesi toılanyp jatqanyn habarlaǵan edik.
