«Qyzǵaldaq mura – 2026» festıvali: Nıderland Koroldigi 40 myń qyzǵaldaq pııazshyǵyn tabystady
ASTANA. KAZINFORM - Jambyl oblysy, Talas aýdanyna qarasty Eseıhan aýyly mańynda qyzǵaldaqtyń tabıǵı murasyn saqtaý jáne dáripteýge arnalǵan «Qyzǵaldaq mura» halyqaralyq festıvali ótti, dep habarlaıdy QR Týrızm jáne sport mınıstrliginiń baspasóz qyzmeti.
Baspasóz qyzmetiniń málimetterine qaraǵanda, Іs-shara Týrızm jáne sport mınıstrligi bekitken 2026 jylǵa arnalǵan resmı kúntizbege engizilgen. Festıvaldiń negizgi maqsaty – oqıǵalyq týrızmdi damytý jáne eldiń mádenı ımıdjin nyǵaıtý.
Festıvalge 6 myńnan astam adam qatysty. Olardyń qatarynda Nıderland, Qytaı Halyq Respýblıkasy jáne Mońǵolııadan kelgen ınvestorlar men týrısterdi qosa alǵanda, shamamen 50 sheteldik qonaq bar.
Festıval aıasynda Nıderland Koroldiginiń ókilderi Jambyl oblysyna 40 myń qyzǵaldaq pııazshyǵyn tabystady. Bul bastama qyzǵaldaq túrlerin saqtaý jáne ósirý salasyndaǵy halyqaralyq yntymaqtastyqty damytýǵa, sondaı-aq óńirdiń qyzǵaldaq týrızmi ortalyǵy retindegi áleýetin arttyrýǵa baǵyttalǵan.
Іs-shara óńirdiń biregeı ekojúıesiniń ajyramas bóligi sanalatyn jabaıy qyzǵaldaqtardyń gúldeý kezeńimen tuspa-tus ótti. Qonaqtar úshin gúldegen alqaptarǵa arnaıy kólik qatynasy uıymdastyrylyp, tabıǵı landshafttarmen jáne qyzǵaldaqtardyń ósý erekshelikterimen tanysýǵa múmkindik jasaldy.
Festıval baǵdarlamasy kontserttik qoıylymdardy, «Qyzǵaldaqtar patshasynyń tarıhy» atty teatrlandyrylǵan kórinisti, fılarmonııa kontsertin, ulttyq sport oıyndaryn, «Qymyzmuryndyq» dástúrin jáne qolónershiler jármeńkesin qamtydy. Sahnada otandyq ónerpazdar Serik Ibragımov, Toqtar Serikov jáne Beıbit Seıdýalıev óner kórsetti.
Sondaı-aq «Taza Qazaqstan» aktsııasy aıasynda aýmaqty tazartý jumystary júrgizildi. Festıval tabıǵı qyzǵaldaq alqaptaryn saqtaýǵa, ekologııalyq jáne oqıǵalyq týrızmdi damytýǵa, sondaı-aq týrızm salasyndaǵy halyqaralyq yntymaqtastyqty keńeıtýge baǵyttaldy.
Osyǵan deıin Qostanaı oblysynda Qyzyl kitapqa engen sırek qyzǵaldaq gúldegeni týraly jazdyq.
