«Qyzǵaldaq mekeni» kórmesiniń ereksheligi nede
ASTANA. KAZINFORM — QR Ulttyq mýzeıinde Qazaqstannyń eńbek sińirgen óner qaıratkeri, sýretshi Qazaqbaı Ájibekulynyń «Qyzǵaldaq mekeni» atty kórmesi bastaldy.
Táýelsizdiktiń 35 jyldyǵyna arnalǵan kórmege qylqalam sheberiniń júzden astam týyndysy qoıylǵan.
Kórme týǵan jerdiń tarıhı jadyn, ulttyq rýhty, tabıǵı bolmys pen táýelsizdik ıdeıasyn kórkemdik turǵydan sabaqtastyrady. Ekspozıtsııanyń negizgi ıdeıasy – qazaq dalasynda tamyr jaıǵan qyzǵaldaq beınesi arqyly halyqtyń qaısarlyǵyn, erkindikke umtylysyn jáne ulttyq bolmysynyń ómirsheńdigin kórsetý.
– Men óz shyǵarmalarymda halqymyzdyń tarıhy, dástúri, turmys-tirshiligin beıneleımin. Osy dúnıeler kórermenniń júregine jetip, jyly sezim uıalatsa, men úshin úlken qýanysh, zor baqyt. Búgin ashylǵan kórmemdi Táýelsizdiktiń 35 jyldyǵyna arnaımyn. Munda ultymyzdyń ótkeni men búginin, bolmysy men bitimin pash etetin, sońǵy on jylda salǵan eńbekterim qoıylǵan, – dedi Qazaqbaı Ájibekuly.
Sonymen qatar kórme keńistiginde Qazaqstannyń baı tarıhı-mádenı murasy men urpaqtar sabaqtastyǵy kórinis tabady. Altyn Orda dáýiri kórinisteri, shyǵystyń uly oıshyly Ábý Nasyr ál-Farabı, dana Abaı, aǵartýshylar men Alash qozǵalysynyń kóshbasshylary sekildi tarıhı tulǵalardyń beıneleri usynylady.
Kórmege kelgen mamandardyń sózinshe, mundaı týyndylar bilim men ádilet, ulttyq erkindik jáne jarqyn bolashaq ıdeıalarymen sabaqtasyp, Táýelsiz Qazaqstannyń rýhanı negizin aıshyqtaıdy.
Aıta keteıik, ónersúıer qaýym kórmeni 5 qańtarǵa deıin tamashalaı alady.
Eske salaıyq, buǵan deıin Ábilhan Qasteev atyndaǵy óner jáne dızaın mektebiniń 45 jyldyǵyna arnalǵan kórme ashylǵanyn jazǵanbyz.
