«QyzdarNet» saıtyna qatysty jedel-izdestirý sharalary aıaqtalǵan joq — polıtsııa
PETROPAVL. KAZINFORM — Soltústik Qazaqstan oblysynyń polıtseıleri «QyzdarNet» saıtyna qatysty istiń qalaı tergelgenin aıtyp berdi.
Qazaqstanda alǵash ret «QyzdarNet» saıty arqyly jezókshelikti uıymdastyrýdy qolǵa alǵan transulttyq uıymdasqan qylmystyq toptyń jetekshisi men qatysýshylary qylmystyq jaýapkershilikke tartyldy.
SQO Polıtsııa departamenti baspasóz qyzmetiniń málimetinshe, tergeý bólimsheleriniń mamandary sońǵy jyldary tyıym salynǵan veb-resýrstyń qyzmetine baılanysty jeńgetaılyq deregi boıynsha 5 qylmystyq isti sotqa joldaǵan. Osy qylmystyq isterdiń materıaldaryn taldaý qylmystyq jeliniń jumys isteý shemasyn anyqtaýǵa jáne qylmystyq uıymnyń kelesi deńgeıine shyǵýǵa múmkindik berdi.
— Qylmystyq is 2025 jylǵy mamyr aıynda tirkeldi. Vedomstvoaralyq tergeý-jedel tobynyń quramyna SQO polıtsııa departamenti men Qazaqstan Respýblıkasy Qarjylyq monıtorıng agenttiginiń qyzmetkerleri kirdi. Jumys Qazaqstan Respýblıkasy Іshki ister mınıstrligi men Bas prokýratýrasynyń úılestirýimen júrgizildi. Tergeý buryn-sońdy bolmaǵan aýqymda júrgizildi. Tergeý jáne jedel-izdestirý is-sharalary barysynda tsıfrlyq izder zerttelip, krıptovalıýta qoldanylǵan tranzaktsııalar men halyqaralyq serverlik ınfraqurylym arqyly júrgizilgen operatsııalar baqylandy, — deıdi polıtseıler.
Mamandardyń aıtýynsha, ótken jyldyń shilde aıynda Astanada jáne Qazaqstannyń basqa da qalalarynda júrgizilgen arnaıy operatsııa nátıjesinde alty kúdikti ustaldy. Olar el aýmaǵynda jezókshelikpen aınalysatyn adamdardyń jarnamasyn jasap, saıtty ákimshilendirgen, sondaı-aq saıt uıymdastyrýshylarynyń múddesine krıptovalıýtamen operatsııalar júrgizgen.
Tergeý 8 aıǵa sozyldy. 2026 jylǵy 19 maýsymda SQO qylmystyq ister jónindegi mamandandyrylǵan aýdanaralyq soty uıymdasqan qylmystyq toptyń negizgi alty qatysýshysyna qatysty aıyptaý úkimin shyǵardy. Olar QR Qylmystyq kodeksiniń 264-babynyń 1-bóligi jáne 309-babynyń 3-bóligi boıynsha kináli dep tanyldy. Al is boıynsha aıyptalýshylardyń biri buǵan qosa QR Qylmystyq kodeksiniń 214-babynyń 2-bóligi jáne 218-babynyń 1-bóligi boıynsha da sottaldy.
Uıymdastyrýshy 10 jylǵa bas bostandyǵynan aıyryldy, al bes negizgi menedjerdiń árqaısysy 8 jylǵa bas bostandyǵynan aıyrý jazasyna kesildi. Úkim ázirge zańdy kúshine engen joq.
Polıtseılerdiń aıtýynsha, osy qylmystyq is boıynsha jedel-izdestirý is-sharalary jalǵasqan. Saıt qyzmetine qatysy bar taǵy bir qyz Grýzııada ustaldy, qazir ony Qazaqstanǵa ekstradıtsııalaýǵa daıyndyq júrgizilý ústinde. Jedel ýákilder, tergeýshiler men krımınalıster qylmystyq shemanyń barlyq qatysýshylaryn anyqtaý jumystaryn jalǵastyryp jatyr.
Buǵan deıin Almatyda ıntım qyzmet kórsetken stýdııa áshkere bolǵanyn jazǵan edik.
